សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ មានហេតុការណ៍ដ៏គួរឲ្យតក់ស្លុតមួយ បានកើតឡើង បន្ទាប់ពីតារាសម្តែងលោក យន សុភក្រ័ ធ្វើដំណើរទៅថតនៅលើភ្នំគិរីរម្យ ស្រាប់តែរថយន្តដែលខ្លួនបានជិះ ជាមួយក្រុមការងារ ផ្ទុះឆេះឡើងយ៉ាងសន្ធោរសន្ធៅ នៅក្នុងតាមផ្លូវពេលចូលដល់ក្នុងព្រៃ ធ្វើឲ្យលោកភ័យស្លន់ស្លោ រត់បាតជើងសព្រាត ស្ទើរតែមិនចង់ទាន់។
ហេតុការណ៍ដ៏គួរឲ្យរន្ធត់នេះ បានកើតឡើងវេលាម៉ោង១០ និង៣០នាទីព្រឹក ថ្ងៃទី៣ ខែតុលា ហើយរថយន្តដែលឆេះ គឺជាប្រភេទសាំយ៉ុង។ លោក យន សុភ័ក្រ បានឲ្យដឹងថា កំឡុងពេលធ្វើដំណើរ ស្រាប់តែធំក្លិនឈ្ងៀមខ្លាំង រហូតលោក និងអ្នកនៅលើឡានទាំងអស់នាំគ្នាវេចបង្វេច រត់ចុះពីឡានសឹងមិនទាន់ ដោយគ្រាន់តែចេញបានបន្តិច ឡានក៏ចាប់ផ្តើមផ្ទុះឆាបឆេះតែម្ដង។
អ្វីដែលធ្វើឲ្យតារាសម្ដែង លោក យន សុភ័ក្រ ពោលទាំងរន្ធត់ក្នុងបណ្ដាញហ្វេសប៊ុកយ៉ាងដូច្នេះថា «ព្រឹត្តិការណ៍ដ៏រន្ធត់ ហើយក៏ជាលើកដំបូងសំរាប់ជីវិតរបស់ខ្ញុំដែរ ដែលខ្ញុំជួបប្រទះ តែមួយប៉ប្រិចភ្នែកប៉ុណ្ណោះ រថយន្តដែលខ្ញុំកំពុងតែជិះត្រូវភ្លើងឆេះគ្មានសល់ ស្ទើរតែរត់ចេញពីរថយន្តសឹងតែមិនទាន់ សំណាងល្អគ្មានអ្នកត្រូវរបួស គ្រាន់តែឆេះអស់សំភារៈមួយចំនួន និងខូចខាតឡានទាំងស្រុង ដែលមិនអាចនឹងពន្លត់បានតែម្ដង»។
យ៉ាងណាមិញ លោក យន សុភ័ក្រ បានបញ្ជាក់ថា ហេតុការណ៍ដ៏គ្រោះថ្នាក់នេះមិនបានធ្វើឲ្យអ្នកនៅក្នុងរថយន្ត រួមជាមួយលោក ជួបគ្រោះថ្នាក់ទេ ដោយគ្រាន់តែខូចខាតអស់សម្ភារៈមួយចំនួន និងខ្ទេចឡានទាំងស្រុង៕ សេនាស័ក្តិ
