សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសកម្មករសំណង់ម្នាក់បានជិះបុកម៉ូតូស្ត្រី២នាក់បណ្តាលឲ្យរងរបួសធ្ងន់ម្នាក់ និងស្រាលម្នាក់កាលពីវេលាម៉ោង៧និង៣០នាទីយប់ ថ្ងៃទី២៤ ខែតុលា ឆ្នាំ២០១៨ នៅតាមបណ្ដោយផ្លូវបេតុង ដែលស្ថិតនៅ ភូមិ ប្រាសាទ សង្កាត់ ស្នោ ខណ្ឌពោធិ៍សែនជ័យ ហើយមិនព្រមដោះស្រាយបែរហៅបក្ខពួកមកវាយគំរាមយកម៉ូតូ ចេញពីកន្លែងកើតហេតុ ត្រូវជនរងគ្រោះប្តឹងសមត្ថកិច្ច ឃាត់បាន ជនបង្កម្នាក់។
ជនរងគ្រោះ មានគ្នា២នាក់ជាម្តាយ និងកូន ជិះម៉ូតូ ម៉ាកគប់៧០ពណ៌ ខៀវ ខ្ចី ពាក់ស្លាកលេខ ឈ 2735ភព1 ចេញពីមន្ទីរពេទ្យ ហើយទៅផ្ទះ ក្នុងទិសដៅពី ជើងទៅត្បូង ហើយបត់ឆ្វេង ។ ចំណែកជនបង្ក ជិះម៉ូតូ ម៉ាកឌ្រីម សង់ស៊េរី ២០១៨ ពណ៌ខ្មៅ មិនចាំ ស្លាកលេខ រត់បាត់ ។
សាក្សបានឲ្យដឹងថា នៅមុនពេលកើតហេតុ រូបគាត់ បានឌុបកូនស្រី របស់គាត់ ចេញពី មន្ទីរពេទ្យ ឯកជន ពីភូមិស្រែតេជៈ មកផ្ទះវិញ ក្នុងទិសដៅពី ជើងទៅត្បូង។ ចំណែកម៉ូតូបង្កជិះស្របគ្នា ហើយម៉ូតូរងគ្រោះ បានសេញ៉ូបត់ឆ្វេង ស្រាប់តែម៉ូតូបង្ក បានបុកពីក្រោយតែម្តង ។ ខណៈគ្រោះថ្នាក់ភ្លាមៗ ភាគីរងគ្រោះ និងប្រជាពលរដ្ឋបានឃាត់ម៉ូតូបង្កនេះ ដើម្បីដោះស្រាយ។ បន្ទាប់មកភាគី បង្កនោះដែរ បានទៅហៅ បក្ខពួកជាកម្មករដូចគ្នា ប្រមាណជិត១០នាក់ មកគំរាម និងយកដុំថ្មគប់ភាគីរងគ្រោះ និងប្រជាពលរដ្ឋ រងរបួស ២នាក់ទៀត ។
ក្រោយពេលកើតហេតុ ជនរងគ្រោះបានប្តឹងសមត្ថកិច្ចចុះអន្តរាគមន៍ឃាត់ជនបង្កភ្លាមៗ ហើយត្រូវបានកម្លាំងអន្តរាគមន៍ខណ្ឌពោធិ៍សែនជ័យឃាត់យកទៅសាកសួរនៅ ប៉ុស្តិ៍នគរបាលសង្កាត់ស្នោដើម្បីចាត់ការតាមនីតិវិធី ៕ សុខាសែនជ័យ
