សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តហ៊ីយ៉ាន់ដាយដឹកអំបិលមួយគ្រឿង បុករថយន្តឡិចស៊ីសពីក្រោយ រួចបួងចង្កូតឡើងទ្រូងផ្លូវទៅមុខលែងរួច ។
ហេតុការណ៍នេះ បានកើតឡើង កាលពីម៉ោងជិត៨ ថ្ងៃទី១៨ ខែវិច្ឆិកា ឆ្នាំ២០១៨ ស្ថិតនៅតាមផ្លូវជាតិលេខ៥ ខាងមុខអតីតឃ្លាំងសាំងសូគីមិច ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុ ឃើញរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ បន្ទាយមានជ័យ 3A-0284បើកស្របទិសគ្នា ជាមួយ រថយន្ត ម៉ាកឡិចស៊ីស ពណ៌ស ពាក់ស្លាកលេខ ភ្នំពេញ 2AE-1061 តាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូងដោយរថយន្តឡិចស៊ីស បើកមុខរថយន្តហ៊ីយ៉ាន់ដាយដឹកអំបិលបើកខាងក្រោយ ខណៈមកដល់ចំណុចកើតហេតុ រថយន្តឡិចស៊ីសបានឈប់ចាំភ្លើងស្កុប ហើយរថយន្តហ៊ីយ៉ាន់ដាយដឹកអំបិលជ្រុលបុកពីក្រោយរួចបួងចង្កូតមកឆ្វេងដៃឡើងខឿនទ្រូងផ្លូវទៅមុខលែងរួច ។
បន្ទាប់ពីកើតហេតុភាគីរថយន្តបង្កបានដោះស្រាយចេញថ្លៃជួសជុលរថយន្តឡិចស៊ីសបញ្ចប់រឿង ។ ចំណែករថយន្តហ៊ីយ៉ាន់ដាយដឹកអំបិល ដោយសារប៉ះពាល់ដល់ខឿនទ្រូងផ្លូវសារណ:របស់រដ្ឋ ត្រូវបានសមត្ថកិច្ចជំនាញក្រុងយកទៅរក្សាទុកនៅការិយាល័យផ្លូវគោករង់ចាំដោះស្រាយនៅពេលក្រោយ ៕ ជ្រោយពេជ្រ
