សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្ដដឹកដីមួយគ្រឿងលឿនពេក ខណៈមានរថយន្ដមួយទៀតនៅពីមុខចាប់ហ្រ្វាំងអត់ទាន់ ក៏រេចង្កូតធ្លាក់ផ្លូវបណ្ដាលឲ្យក្រឡាប់ផ្ងារជើងឡើងលើយ៉ាងច្រង៉ាង ។
ហេតុការណ៍នេះដែរ បង្កការភ្ញាក់ផ្អើលកាលពីវេលាម៉ោង១ និង១០នាទីរសៀល ថ្ងៃទី២១ ខែវិច្ឆិកា ឆ្នាំ២០១៨ ស្ថិតនៅតាមបណ្ដោយផ្លូវ២១៧ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
យោងតាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុ គេឃើញមានរថយន្ដដឹកដីមួយគ្រឿង ក្បាលពណ៌ស ពាក់ស្លាកលេខ ភ្នំពេញ 3B-8631 បានធ្វើដំណើរពីជើងទៅត្បូងក្នុងល្បឿនលឿនបើកបរដោយបុរសម្នាក់ ខណៈដែលមកដល់ចំណុចកើតហេតុ ក៏មានរថយន្ដមួយគ្រឿងទៀត បើកនៅចំពីមុខ ពេលនោះរថយន្ដដឹកដី បើកលឿនពេកចាប់ហ្រ្វាំងអត់ទាន់ រេចង្កូតធ្លាក់ផ្លូវបណ្ដាលឲ្យរថយន្ដដឹកដីក្រឡាប់ផ្ងារជើងឡើងលើ យ៉ាងច្រងាង ចំណែកឯម្ចាស់កៃកុងរថយន្ដ រងរបួសស្រាល ឯរថយន្ដមួយទៀត បានបើកទៅមុខបាត់ស្រមោល ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ឲ្យខាងម្ចាស់រថយន្ដបង្កអូសយកទៅជួសជុលដោយខ្លួនឯង ៕ ភារ៉ា ដង្កោ
