សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ នគរបាលស្រុកខ្សាច់កណ្ដាលចាប់ខ្លួនជនសង្ស័យជាមុខសញ្ញាលួចសកម្ម២នាក់ ខណៈ ដែលក្រុមជនសង្ស័យខាងលើធ្វើសកម្មភាពលួចម៉ាស៊ីនគោយន្ដ និងក្បាលបូបទឹករបស់ពលរដ្ឋ ។ ករណីចាប់ខ្លួនខាងលើនេះ ធ្វើឡើងកាលពីវេលាម៉ោង១៧ និង៣០នាទី ថ្ងៃសៅរ៍ ទី២៤ ខែវិច្ឆិកា ឆ្នាំ២០១៨ ស្ថិតក្នុងភូមិកណ្តាល ឃុំកោះចូរ៉ាម ស្រុកខ្សាច់កណ្តាល ។
មន្រ្ដីនគរបាលស្រុកខ្សាច់កណ្ដាលបានឲ្យដឹងថា ជនសង្ស័យចាប់ខ្លួនមាន២នាក់ ទី១-ឈ្មោះ ញ៉ែម ពុទ្ធមិនា ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិបឹងជន្លេន ឃុំឫស្សីជ្រោយ ស្រុកមុខកំពូល ខេត្តកណ្តាល ទី២-ឈ្មោះ រត្ន័ សៀ ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិព្រែកអញ្ចាញ ឃុំព្រែកអញ្ចាញ ស្រុកមុខកំពូល ខេត្តកណ្តាល ។ ចំណែកជនរងគ្រោះឈ្មោះ ឃាង ផល្លា ភេទប្រុស អាយុ៣៥ឆ្នាំ ជនជាតិខ្មែរ មុខរបរ កសិករ មានទីលំនៅភូមិឃុំកើតខាងលើ ។ ដោយឡែកវត្ថុតាងដកហូតបានមាន៖ ម៉ូតូ១គ្រឿង ម៉ាក Wave គ្មានផ្លាកលេខ និងរឺម៉ក១ (របស់ជនសង្ស័យ) ,ម៉ាស៊ីនគោយន្ត និងក្បាលបូមទឹកចំនួន១ (របស់ជនរងគ្រោះ) ។
ប្រភពដដែលបន្ដថា តាមការឆ្លើយបំភ្លឺរបស់ជនសង្ស័យទាំង២នាក់ប្រាប់សមត្ថកិច្ចថា នៅថ្ងៃទី២៤ ខែវិច្ឆិកា ឆ្នាំ២០១៨ ពួកគេទាំង២នាក់បាននាំគ្នាបើកម៉ូតូដោយសណ្ដោងរ៉ឺម៉កមកជាមួយផងដែរ ជិះចេញមកពីភូមិឈើទាល ឃុំព្រែកអញ្ចាញ ឆ្ពោះមកភូមិកណ្ដាល ឃុំកោះចូរ៉ាម ក្នុងគោលបំណងដើរលួចទ្រព្យសម្បត្តិអ្នកដទៃ ។ លុះដល់វេលាម៉ោង ១៧ និង៣០នាទី រូបគេទាំង២នាក់(ជនសង្ស័យ)បានជិះម៉ូតូចូលចំការស្វាយរបស់ជនរងគ្រោះ ដោយឃើញម៉ាស៊ីនគោយន្ត និងក្បាលបូមទឹក ក៏នាំគ្នាលើកដាក់លើរ៉ឺម៉ក ហើយជិះចេញ ខណៈជិះមកដល់មុខវត្តកោះចូរ៉ាម ស្រាប់តែជនរងគ្រោះតាមទាន់បានស្រែកឆោឡោឲ្យប្រជាពលរដ្ឋជួយចាប់រូបគេទាំង២នាក់ និងរាយការណ៍ជូនសមត្ថកិច្ចនគរបាលប៉ុស្តិ៍កោះចូរ៉ាមដើម្បីចុះអន្តរាគមន៍ឃាត់ខ្លួនជនសង្ស័យទាំង២នាក់ បញ្ជូនមកអធិការដ្ឋាននគរបាលស្រុក ដើម្បីបន្តចាត់ការតាមនីតិវិធី ៕ ស្អាងជ័យ
