បុរសម្នាក់អុកឡុកគ្រួសារ ឪពុកម្តាយ ទ្រាំលែងបាន ប្តឹងនគរបាលចាប់ខ្លួន

ភ្នំពេញ៖​ ជនសង្ស័យម្នាក់ ត្រូវសមត្ថកិច្ចឃាត់ខ្លួន ដោយសារក្រុមគ្រួសារប្តឹងថា បានបង្កការអុកឡុកក្នុងក្រុមគ្រួសារ និងមានប្រើប្រាស់គ្រឿងញៀនទៀតផង ។ ឃាត់ខ្លួនកាលពីវេលាម៉ោង០៨ និង៣០នាទីព្រឹក ថ្ងៃទី២៨ វិច្ឆិកា ២០១៨ នៅភូមិភ្នំពេញថ្មី សង្កាត់ ភ្នំពេញថ្មី ខណ្ឌសែនសុខ ។

ជនសង្ស័យឈ្មោះ ហម ស៊ាវហ្វី អាយុ ២៥ឆ្នាំ មុខរបរមិនពិតប្រាកដ ស្នាក់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។

ប្រភពពីសមត្ថកិច្ចបានប្រាប់ថា មុនឃាត់ខ្លួនជនខាងលើ ខណៈដែលមានស្ត្រីជាម្តាយប្តឹងផ្ទាល់មាត់ ពាក់ព័ន្ធកូនប្រុសគាត់ប្រើប្រាស់គ្រឿងញៀន ដល់កម្រិតទាញដាវឆ្នៃគំរាម និងអុកឡុកក្នុងផ្ទះ ដើម្បីរកលុយទិញថ្នាំញៀនជក់ ក្រោយពីមានប្រជាពលរដ្ឋប្តឹងភ្លាមកម្លាំង សមត្ថកិច្ច ក៏ចុះទៅឃាត់ខ្លួនបុរសខាងលើដល់ផ្ទះ និងយកមកសាកសួរនៅប៉ុស្តិ៍ភ្លាមៗ ។

សមត្ថកិច្ចដដែលបានប្រាប់ទៀតថា ក្រោយឃាត់យកមកដល់ប៉ុស្តិ៍ដើម្បីសាកសួរ និងធ្វើតេសទឹកនោម រកសារធាតុញៀនឃើញថា ជនសង្ស័យខាងលើ ក្នុងទឹកនោមមានផ្ទុកនូវសារធាតុញៀនពិតប្រាកដមែន សមត្ថកិច្ច ក៏ឃាត់ខ្លួនតែម្តង ។

បច្ចុប្បន្ន បុរសបង្កអុកឡុកក្នុងគ្រួសារខាងលើ ត្រូវបានកសាងឯកសារ និងបញ្ជូនទៅកាន់ផ្នែកជំនាញនគរបាលយុត្តិធម៌ នៃអធិការដ្ឋាននគរបាល ខណ្ឌសែនសុខដើម្បីចាត់ការបន្ត ៕ តុង សីហា