ស្រ្ដីចំណាស់ម្នាក់ ដេកស្លាប់ដោយសារជំងឺបេះដូង ជំងឺលើសឈាម និងជំងឺទឹកនោមផ្អែម

ខេត្តកំពង់ធំ៖ ស្រ្ដីចំណាស់ម្នាក់ដេកស្លាប់តែម្នាក់ឯង មិនដឹងស្លាប់តាំងពីពេលណាមក នោះទេ លុះដឹងដល់សមត្ថកិច្ច គឺវេលាម៉ោង៤រសៀលទៅហើយ ថ្ងៃទី 29 ខែវិច្ឆិកា ឆ្នាំ២០១៨ ស្ថិតនៅភូមិ កំពង់ថ្ម ឃុំកំពង់ថ្ម ស្រុកសន្ទុក ខេត្តកំពង់ធំ ។​

តាមការបញ្ជាក់របស់សមត្ថកិច្ច នៅថ្ងៃទី ៣០ ខែវិច្ឆិកា ឆ្នាំ ២០១៨ថា ជនរងគ្រោះឈ្មោះ ប៉ុល ចន្ទ្រា គ្មានប្ដី គ្មានកូនចៅនោះទេ រស់នៅតែម្នាក់ឯង ហើយមានជំងឺប្រចាំកាយ ជំងឺបេះដូង ជំងឺលើសឈាម ជំងឺទឹកនោមផ្អែម ទើបតែមក ជួលផ្ទះ ឈ្មោះ សំចាន់ធី នៅភូមិ កងសៅ ឃុំកំពង់ថ្ម ស្រុកសន្ទុក បានជាង១ខែ លក់ដូរ ភេសជ្ជៈ បន្តិចបន្តួច ។​

តាមការបំភ្លឺ របស់ឈ្មោះ ប៉ុល ពេជ ភេទស្រី អាយុ ៥៨ ឆ្នាំ ត្រូវជាប្អូនបង្កើតរបស់ ជនរងគ្រោះ ថា បងស្រីរបស់ខ្លួន កន្លងមក តែងមានជំងឺប្រចាំកាយ ហើយរស់នៅតែម្នាក់ឯង គ្មានកូនថែទាំទេ ។​

តាមការបំភ្លឺ របស់ឈ្មោះ ម៉នស៊ីណាត ភេទស្រី អាយុ ១៨ ឆ្នាំ មុខរបរសិស្ស និងឈ្មោះ សុខកែវ ភេទប្រុស អាយុ ២០ ឆ្នាំ ជាសិស្ស មានទីលំនៅ ភូមិ ដងក្តាឃុំក្រយា ស្រុកសន្ទុក ខេត្តកំពង់ធំ បានជួលផ្ទះ ស្នាក់នៅបន្ទប់ជាប់គ្នា នឹងជនរងគ្រោះ ក្រោយពេលសម្រាក ពិធីបុណ្យអកអំបុក វិញ កាលពីថ្ងៃទី ២៦ ខែវិច្ឆិកា ឆ្នាំ ២០១៨ មានធុំក្លិនស្អុយ បន្ទប់ជាប់គ្នា ក៏បានទូរស័ព្ទប្រាប់ម្ចាស់ផ្ទះ លុះដល់ថ្ងៃទី ២៩ ខែវិច្ឆិកា ឆ្នាំ ២០១៨ ម្ចាស់ផ្ទះប្រាប់ថា ឲ្យគាស់ទ្វារបន្ទប់ នាំគ្នាចូលមើល បានប្រទះឃើញ ស្រ្ដីរងគ្រោះដេកស្លាប់នៅក្នុងបន្ទប់នេះ ក៏មានការភ្ញាក់ផ្អើលដល់អ្នកភូមិ រាយការណ៍ប្រាប់ក្រុមគ្រួសារសព មកជួយពិនិត្យមើល ឃើញសាកសព ហើមធុំក្លិនស្អុយ មិនដឹងបានស្លាប់ពីថ្ងៃណានោះទេ ។​

ក្រោយដឹងព័ត៌មានខាងលើនេះ កម្លាំងជំនាញ បច្ចេកទេសខេត្ត និងស្រុកបានចុះដល់កន្លែងកើតហេតុ សហការជាមួយប៉ុស្តិ៍រដ្ឋបាលរដ្ឋអំណាចភូមិ ឃុំ គ្រូពេទ្យប្រចាំភូមិ ចូលរួមពិនិត្យ សាកសពពុំឃើញមានស្លាកស្នាម អ្វីកត់សម្គាល់នោះទេ រួចសន្និដ្ឋានថា ជនរងគ្រោះឈ្មោះ ប៉ុល ចន្ទ្រានេះ គឺស្លាប់ដោយសារជំងឺគាំងបេះដូងពិតប្រាកដមែន ។

ក្រោយពិនិត្យ ចប់ហើយ សមត្ថកិច្ចបានធ្វើកំណត់ហេតុប្រគល់សាកសព ជូនទៅក្រុមគ្រួសារសពដើម្បីយកទៅធ្វើបុណ្យតាមប្រពៃណី ៕ ប៊ុនរិទ្ធី