សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ផ្ទះល្វែងមួយល្វែង ខាងក្រោមធ្វើអំពីថ្ម រីឯជាន់ទី១ធ្វើបន្ទប់ឈើប្រកស័ង្កសី ត្រូវបានអគ្គិភ័យឆេះ បង្កឲ្យមានការភ្ញាក់ផ្អើលដល់រថយន្តពន្លត់អគ្គិភ័យចុះមកអន្តរាគមន៍ កាលពីវេលាម៉ោង៧និង៣០នាទីយប់ ថ្ងៃទី៩ ខែធ្នូ ឆ្នាំ២០១៨ ត្រង់ចំណុចផ្ទះលេខ៣៧H ផ្លូវលំ ជាប់ខាងក្រោយរបងវិទ្យាល័យឥន្ទ្រទេវី ស្ថិតក្នុងភូមិ៤ សង្កាត់បឹងកក់ទី២ ខណ្ឌទួលគោក ខណៈដែលម្ចាស់បានចាក់សោចោល ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គឺម្ចាស់ផ្ទះកើតហេតុខាងលើ បានចាក់សោរទុកចោលមិនមានអ្នកនៅនោះទេ ព្រោះម្ចាស់ផ្ទះពីមុនបានលក់ផ្ទះខាងលើឲ្យទៅគេ ។ លុះនៅមុនពេលកើតហេតុគេឃើញស្ត្រីម្នាក់ ដែលត្រូវជាកូនស្រីរបស់អតីតម្ចាស់ផ្ទះ បានឡើងតាមជណ្ដើរដែលនៅចំហៀងផ្ទះចូលទៅសម្រាកនៅក្នុងបន្ទប់ឈើប្រកស័ង្កសី ទំហំប្រមាណ២ម៉ែត្រគុណនិង៥ម៉ែត្រ ដែលនៅខាងលើដំបូលផ្ទះកើតហេតុ ហើយបានប្រមាណមួយម៉ោងក្រោយមកស្ត្រីខាងលើនោះ ក៏បានដើរចុះមកចេញពីកន្លែងកើតហេតុបាត់ទៅ ។ ស្រាប់តែដល់វេលាម៉ោងកើតហេតុក៏មានធំក្លិនឈ្ងៀមនឹងមានផ្សែងចេញពីបន្ទប់ដែលនៅខាងលើដំបូលផ្ទះកើតហេតុខាងលើ និងមានជាអណ្ដាតភ្លើងឆាបឆេះចេញមក ក៏បង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរនោះនាំគ្នាយកបំពង់ពន្លត់អគ្គិភ័យបាញ់ពន្លត់អស់៤ទៅ៥បំពង់ តែដោយមិនអាចគ្រប់គ្រងស្ថានការណ៍បាន។
ភ្លាមប្រជាពលរដ្ឋក៏បានរាយការណ៍ជូនសមត្ថកិច្ចមូលដ្ឋាននិងរថយន្តពន្លត់អគ្គិភ័យឲ្យចុះមកជួយអន្តរាគមន៍ បន្ទាប់មកក៏មានរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញមកចំនួន៥គ្រឿងរួចក៏បានធ្វើការបាញ់ទឹកពន្លត់អស់ចំនួនបីគ្រឿងក៏រលត់ទៅវិញជាស្ថាពរ ។
ចំពោះករណីអគ្គិភ័យសមត្ថកិច្ចបញ្ជាក់ថា គឺមិនបង្កឲ្យឆេះរាលដាលដល់ផ្ទះអ្នកជិតខាងនោះ គ្រាន់តែឆេះបន្ទប់ខាងលើរងការទាំងស្រុង ហើយក្នុងករណីនេះជំហានដំបូងសមត្ថកិច្ចសន្និដ្ឋានថាគឺបណ្តាលមកពីឆ្លងចរន្តអគ្គិសនី ៕ស តារា
