សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសជាកម្មករម្នាក់បានរងរបួសធ្ងន់ ខណៈកំពុងជិះម៉ូតូតាមផ្លូវ ស្រាប់តែមានរថយន្តមួយគ្រឿងបើកបុកពីក្រោយស្របទិសគ្នាយ៉ាងពេញទំហឹងលាន់ដូចរន្ទះ បង្កការភ្ញាក់ផ្អើលកាលពីថ្ងៃទី៩ ខែធ្នូ ឆ្នាំ២០១៨ វេលាម៉ោង៨យប់ លើផ្លូវជាតិលេខ១ ចន្លោះគីឡូម៉ែត្រលេខ ១២៦ និងលេខ១២៧ ស្ថិតក្នុងភូមិ ថ្មី សង្កាត់ សង្ឃ័រ ក្រុង ស្វាយរៀង ។
បើតាមសមត្ថកិច្ចនគរបាលខេត្តស្វាយរៀងបានឲ្យដឹងថា បុរសរងគ្រោះមានឈ្មោះជា វិបុល អាយុ ២២ ឆ្នាំ មុខរបរ កម្មកររោងចក្រ រស់នៅភូមិ បុសមន ឃុំ បុសមន ស្រុក រំដួល ខេត្ត ស្វាយរៀងជិះម៉ូតូម៉ាកហុងដាសេ ១២៥ ពណ៌ ខ្មៅ ពាក់ស្លាកលេខ ភ្នំពេញ ១FM ៩០២៤ ខូចខាតយ៉ាងដំណំ ។
ចំណែកអ្នកបើករថយន្តមិនត្រូវបានស្គាល់ឈ្មោះនោះទេ ក្រោយពីបង្កហេតុ បានរត់គេចខ្លួន បន្សល់តែរថយន្តម៉ាក COROLLA ពណ៌ ទឹកមាស ពាក់ស្លាកលេខ ភ្នំពេញ ២X ៣៦០៤ ។
តាមសាក្សីបានឲ្យដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកហុងដា សេ១២៥ ពណ៌ខ្មៅ ដោយធ្វើដំណើរ ពីលិចទៅកើត ផ្លូវជាតិលេខ១ ខណៈនោះ ស្រាប់តែមានរថយន្តមួយគ្រឿងម៉ាក COROLLAពណ៌ ទឹកមាស ប្រើប្រាស់ល្បឿនលឿនបុកពីក្រោយ អ្នកជិះម៉ូតូពីក្រោយ ស្របទិសគ្នាយ៉ាងពេញទំហឹង បង្កការភ្ញាក់ផ្អើលដល់អ្នកភូមិរាយការណ៍មក សមត្ថកិច្ចមូលដ្ឋានភ្លាមៗ មកអន្តរាគមន៍យកជនរងគ្រោះមកកាន់មន្ទីរពេទ្យ ចំណែក អ្នកបើកបរបង្កហេតុ បើកទ្វាររត់គេចពីកន្លងកើតហេតុ បន្សល់ទុករថយន្ដនៅកន្លែងកើតហេតុ ។
ចំណែកមធ្យោបាយទាំង២គ្រឿង សមត្ថកិច្ចវាស់វែង និងអូសយកទៅការិយាល័យចរាចរណ៍ខេត្តស្វាយរៀងដើម្បីដោះស្រាយពេលក្រោយ ៕ យឹម សុថាន
