សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម: ជនសង្ស័យឈ្មោះឃ្លី វណ្ណ: ភេទប្រុស អាយុ២៧ឆ្នាំ ជនជាតិខ្មែរ មានទីលំនៅភូមិ១ ផ្លូវ១៤៣ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ មានមុខរបរទិញលក់និងបើកកន្លែងលាងរថយន្តនៅខណ្ឌចំការមន ត្រូវបានលោក នៅ យ៉ារ័ត្ន ចៅក្រមស៊ើបសួរសាលាដំបូងខេត្តកំពង់ចាម ចេញដីកាបង្កាប់ឲ្យឃុំខ្លួនហើយកាលពីថ្ងៃសុក្រ ១៤ កើត ខែ មិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែធ្នូ ឆ្នាំ២០១៨ ។
មន្រ្តីគរបាលខេត្តកំពង់ចាមបានឲ្យដឹងថា ជនសង្ស័យខាងលើត្រូវបានចោទប្រកាន់ពីបទ៖ កាន់កាប់អាវុធដោយគ្មានការអនុញ្ញាត និងប្រើប្រាស់ដោយខុសច្បាប់នូវសារធាតុញៀន ដែលប្រព្រឹត្តនៅភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម កាលពីថ្ងៃទី១៩ ខែធ្នូ ឆ្នាំ២០១៨ តាមមាត្រា២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ និងតាមមាត្រា៤៥ នៃច្បាប់ស្តីពីការត្រួតពិនិត្យគ្រឿងញៀន ក្រោយពីសមត្ថកិច្ចឆែកឆេររកឃើញមានអាវុធ២ដើម ជា មួយនឹងបង់គ្រាប់នៅក្នុងរថយន្តរ៉ង់រ៉ូវ៉ែពាក់ស្លាកលេខ ភ្នំពេញ 2U-0199 មួយគ្រឿងផងដែរ ។
របាយការណ៍របស់ស្នងការដ្ឋាននគរបាលខេត្ត បានឲ្យដឹងថាការឃាត់ខ្លួននេះ គឺនៅក្រោយបទបញ្ជារបស់ លោកអភិបាល នៃគណ:អភិបាលខេត្ត កំពង់ចាម ឲ្យតាមឆែកឆេររកអត្តសញ្ញាណរបស់បុរសម្នាក់ ដែលមានគណនេយ្យ ហ្វេសប៊ុកឈ្មោះ (Kongkia VS) ដែលបានបង្ហោះរូបភាព បង្អួតកាំភ្លើងច្រង៉េងច្រង៉ាង លើតាប្លូ រថយន្ត ។
លោកឧត្តមសេនីយ៍ទោ ឯម កុសល ស្នងការនគរបាលខេត្ត បានថ្លែងថាលោកបានចេញបទបញ្ជា ដល់ជំនាញ ពាក់ព័ន្ធ ដើម្បីកំណត់អត្តសញ្ញាណបុគ្គលនេះ ព្រមទាំងបញ្ជាឲ្យអធិការស្រុក-ក្រុងទាំង១០ កំណត់គោល ដៅស្វែងរកជាបន្ទាន់ ហើយមួយសន្ទុះក្រោយមកកម្លាំងរបស់លោកបានឃាត់រថយន្តខាងលើហើយរកឃើញមានអាវុធ២ដើម អាកាស្វាយវែង ០១ដើម លេខ ៤៣៦២ បង់មួយគ្រាប់គ្មាន, អាវុធខ្លី០១ដើម ម៉ាកpak លេខ ០៨១៦.០០១០៤៨ បង់០១ គ្រាប់០៦ដែលអាវុធទាំងនេះ មិនមានលិខិតសម្គាល់ ជាកម្មសិទ្ធិរបស់ឈ្មោះឃ្លី វណ្ណ:នោះឡើយ ប៉ុន្តែជនសង្ស័យអះអាងថា គឺជារបស់បងឈ្មោះ ហាក់ ប៉េងឃីម អាយុ៣៤ឆ្នាំមានទីលំនៅភូមិឃុំ ជាមួយគ្នា និងមានមុខរបរនគរបាលក្រសួងមហាផ្ទៃទៅវិញ ៕ សហការី
