សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ បុរសជាប្តីត្រូវសមត្ថកិច្ចនគរបាលចាបវ៉ៃខ្នោះភ្លាម បន្ទាប់ពីបានប្រើអពើហិង្សា លើប្រពន្ធរបស់ខ្លួន បណ្តាលឲ្យរងរបួស ព្រោះតែសុំលុយប្រពន្ធមិនបាន ថែមទាំងលួចយកទូរស័ព្ទប្រពន្ធបម្រុងយកទៅលក់ទៀត ។
អំពើហិង្សាលើប្រពន្ធនេះបានកើតឡើងកាលពីរសៀលថ្ងៃព្រហស្បតិ៍ ១៣ កើត ខែ មិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី២០ ខែធ្នូ ឆ្នាំ២០១៨ នៅភូមិកំពង់ ឃុំព្រះបាទជាន់ជុំ ស្រុកគិរីវង់ ខេត្តតាកែវ។
មន្រ្តីនគរបាលស្រុក គិរីវង់ បានឲ្យដឹងថា ជនសង្ស័យឈ្មោះ ម៉ម ពុធ ភេទប្រុស អាយុ៤៤ឆ្នាំ មុខរបរធ្វើស្រែ មានទីលំនៅកន្លែងកើតហេតុខាងលើ ។ បុរសនេះបានធ្វើសកម្មភាពវាយទៅលើប្រពន្ធ បណ្តាលឲ្យរងរបួសជាច្រើនកន្លែង ដោយសារសុំលុយប្រពន្ធ៤ម៉ឺនរៀល តែប្រពន្ធមិនឲ្យ ក្រោយមកបានលួចទូរសព្ទ័ប្រពន្ធបម្រុងយកទៅលក់ ទើបកើតរឿងវាយតប់ប្រពន្ធ យ៉ាងចាស់ដៃបែបនេះ ។
អ្នកភូមិបានប្រាប់សមត្ថកិច្ចថា កន្លងមកបុរសនេះតែងវាយធ្វើបាបប្រពន្ធច្រើនលើកច្រើនសាណាស់ តែគ្មានអ្នកណាហ៊ានចូលជួយ ។
បច្ចុប្បន្នជនសង្ស័យជាប្តីត្រូវបាន កម្លាំងសមត្ថកិច្ចឃាត់ខ្លួនដើម្បីសាកសួរនឹងកសាងសំណុំរឿងតាមនិតិវិធី គ្រាដែលស្រ្តីរងគ្រោះទៅរុំរបួសក្នុងមណ្ឌលសុខភាព ៕ សហការី
