សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រតិបត្តិករទូរស័ព្ទចល័តឈានមុខគេមួយនេះ បានពង្រីកវិសាលភាពសេវាកម្ម SmartPay ខ្លួនទៅនឹងហេដ្ឋារចនាសម្ព័ន្ធផ្ទាល់របស់ Apple រួមមានដូចជា៖ App Store, Apple Music និង iTunes ដែលនេះគឺជាសមិទ្ធិផលថ្មីមួយទៀត បន្ទាប់ពីការដាក់ឲ្យដំណើរការសេវាកម្ម SmartPay នេះជាមួយនឹង Google Play Store នាដើមឆ្នាំ 2018 កន្លងទៅនេះ។
អតិថិជនរបស់ក្រុមហ៊ុន Smart Axiata ទាំងអស់អាចជាវកម្មវិធីរបស់ Apple ក៏ដូចជាជាវកម្មវិធី និងផលិតផលឌីជីថលនានា តាមរយៈការប្រើប្រាស់ទឹកប្រាក់នៃគណនីគោល (Main Balance) ដែលមានក្នុងទូរស័ព្ទដៃរបស់ខ្លួនបានដោយងាយស្រួលបំផុត។ជាមួយទៅនឹងការផ្សាភ្ជាប់រចនាសម្ព័ន្ធរបស់ Apple នឹងសេវាកម្ម SmartPay ឥឡូវនេះអតិថិជនរបស់ក្រុមហ៊ុន Smart ទាំងអស់ដែលប្រើប្រាស់ទូរស័ព្ទដៃប្រតិបត្តិការជាមួយនឹងកម្មវិធី iOS កាន់តែមានភាពងាយស្រួលបំផុត ដោយពួកគាត់អាចជាវកម្មវិធីឌិជីថលនានាជាច្រើនរួមមាន៖ apps, ខ្សែភាពយន្ត, ហ្គេមកំសាន្ត, សៀវភៅបែបអេឡិចត្រូណិក ព្រមទាំង កម្មវិធីក្នុង App Store ជាច្រើនទៀតដូចជា Apple Music, iCloud និង iTunes ជាដើម ។ល។ ដោយប្រើប្រាស់ទឹកប្រាក់ពីគណនីគោល (Main Balance) ដែលមានក្នុងទូរស័ព្ទដៃរបស់ខ្លួន។ ដូច្នេះពីពេលនេះតទៅអតិថិជនរបស់ក្រុមហ៊ុន Smart អាចរីករាយ និងទទួលបានអត្ថប្រយោជន៍នានាជាច្រើនពី App Store, Apple Music និង iTunes បានដោយមិនចាំបាច់មានគណនីធនាគារ ឬកាតឥណទានពីធនាគារទៀតឡើយ។
លោក Stjepan Udovicic អគ្គនាយកផ្នែកទីផ្សាររបស់ក្រុមហ៊ុន Smart Axiata បាននិយាយថា “មុននឹងឆ្លងទៅកាន់ឆ្នាំថ្មីខាងមុខនេះ យើងខ្ញុំមានមោទនភាព និងរីករាយយ៉ាងក្រៃលែង ដោយបានបិទបញ្ចប់ទំព័រឆ្នាំចាស់ជាមួយទៅនឹងការដាក់ឲ្យដំណើរការកម្មវិធីថ្មីនេះ ព្រមទាំងសេវាកម្មជាច្រើនផ្សេងទៀតរួមមាន៖ សេវាកម្ម eSIM និង VoWi-Fi ដែលទើបតែដាក់ឲ្យដំណើរការនាពេលថ្មីកន្លងទៅនេះប្រកបដោយជោគជ័យ។ ជាមួយសេវាកម្ម SmartPay អតិថិជនរបស់ក្រុមហ៊ុន Smart ទាំងអស់អាចរីករាយជាមួយនិងបទពិសោធន៍នៃកម្មវិធីឌីជីថលរបស់ Apple យ៉ាងសមញ្ញ មានតម្លារភាព សុវត្ថិភាព និងកាន់តែងាយស្រួលបំផុត។ ពីថ្ងៃនេះតទៅអតិថិជនរបស់ Smart ទាំងអស់អាចជាវផលិតផល និងសេវាកម្មឌីជីថលពី Apple និង Google បានដោយមិនចាំបាច់មានគណនីធនាគារ ឬកាតឥណទានពីធនាគារទៀតឡើយ ដែលនេះគឺជាការចូលរួមចំណែកក្នុងការលើកស្ទួយវិស័យឌីជីថលក្នុងព្រះរាជាណាចក្រកម្ពុជាឲ្យកាន់តែប្រសើរឡើង។
សេវាកម្ម SmartPay នេះមិនមានតម្រូវឲ្យបង់ប្រាក់ចំពោះការភ្ជាប់សេវានោះឡើយ។ រាល់ការជាទាំងអស់ គឺត្រូវបានធ្វើឡើងដោយបូកបន្ថែមត្រឹមតែ 10% (ដប់ភាគរយ) នៃតម្លៃសេវាប៉ុណ្ណោះ។
លោក Stjepan Udovicic ក៏បានបន្ថែមទៀតថា “យើងខ្ញុំ បានដាក់ចេញនូវឆន្ទះដ៏ច្បាស់ថា នឹងនាំមកនូវសេវាកម្មទំនើបៗ ប្រកបដោយភាពឆ្នៃប្រឌិត សាមញ្ញ និងពោពេញទៅដោយបទពិសោធន៍បែបឌីជីថល ជូនអតិថិជន Smart ទាំងអស់។ សេវាកម្មដូចជា SmartPay នេះ គឺជាសេវាកម្មទូទាត់តែមួយគត់របស់ក្រុមហ៊ុន Smart ក្នុងព្រះរាជាណាចក្រកម្ពុជា។ យើងខ្ញុំបានតាំងចិត្តខ្ពស់បំផុតក្នុងនាមជាអ្នកនាំមុខគេ និងនៅតែបន្តរក្សាខ្លួនជាអ្នកដំបូងបង្អស់ក្នុងការនាំមកនូវរាល់ផលិតផល និងសេវាកម្មលំដាប់ពិភពលោក ដែលនេះគឺជាការឆ្លុះបញ្ចាំង និងស្របទៅតាមទស្សនៈវិស័យរបស់យើងខ្ញុំដែលបានកំណត់រួច ពោលគឺជា “ប្រតិបត្តិករជើងឯកបែបឌីជីថលក្នុងព្រះរាជាណាចក្រកម្ពុជា នាឆ្នាំ 2020”៕ វឌ្ឍនា
