សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តស៊េរីទំនើបយ៉ាងថ្មីស្រឡាងម៉ាកFord Rangerមួយគ្រឿង បានធ្វើដំណើរក្នុងល្បឿនយ៉ាងលឿន ខណះដល់ផ្លូវបំបែកជាបួនបួងចង្កូតបត់មិនទាន់ ក៏ជ្រុលទៅបុកដើមឈើទើបដាំបាក់អស់២ដើម ឯរថយន្តបង្កបានក្រឡាប់ផ្ងារជើងមួយចំហៀងរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង រំលងអធ្រាត្រ ឈានចូលថ្ងៃទី២ ខែមករា ឆ្នាំ២០១៩ នៅតាមបណ្ដោយផ្លូវ៦០ម៉ែត្រ ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា ដំបូងគេសង្កេតឃើញរថយន្តបង្កម៉ាកFord Ranger ពណ៌ស គ្មានស្លាកលេខ បានធ្វើដំណើរតាមបណ្ដោយផ្លូវ៥០ម៉ែត្រ ទិសដៅពីកើតមកលិច ក្នុងល្បឿនយ៉ាងលឿន ខណះមកដល់ចំណុចកើតហេតុ (កែងផ្លូវ៦០ម៉ែត្រ) ក៏បួងចង្កូតមកស្ដាំដៃ ជ្រុលទៅបុកដើមឈើទើបតែដាំ បណ្ដាលឲ្យបាក់អស់២ដើម ចំណែកឯរថយន្តបង្កបានក្រឡាប់ផ្ងារជើងមួយចំហៀងរងការខូចខាតយ៉ាងដំណំផងដែរ តែមិនបង្កឲ្យមនុស្សណាម្នាក់រងរបួសធ្ងន់ធ្ងរនោះទេ ។
ក្រោយកើតហេតុ ម្ចាស់រថយន្តបង្កបានពឹងពាក់បងប្អូនប្រជាពលរដ្ឋនៅក្បែរទីនោះ មកជួយរុញរថយន្តឲ្យផ្ងារដូចដើមវិញ ហើយបើកចេញពីកន្លែងកើតហេតុទៅបាត់ ទាំងសមត្ថកិច្ចមូលដ្ឋានខណ្ឌដង្កោបណ្ដោយឲ្យចេញទៅ មិនខ្វល់ពីការខូចខាតនៃការបាក់ដើមឈើ២ដើមនោះទេ ៕ ភារ៉ា ដង្កោ
