សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្សប្រុសស្រីចំនួន៣នាក់ជិះម៉ូតូចេញពីធ្វើការបំណងទៅផ្ទះដើម្បីរៀបពីធីភ្ជាប់ពាក្យ ស្រាប់តែជួបគ្រោះថ្នាក់ចរាចរណ៍បណ្តាលឲ្យរងរបួសធ្ងន់ កាលពីវេលាម៉ោង១២និង១០នាទីរំលងអាធ្រាត្រឈានចូលថ្ងៃទី៧ខែមករាឆ្នាំ២០១៩ នៅចំណុចផ្លូវលេខ១៩៣កែងផ្លូវម៉ៅសេទុង ស្ថិតក្នុងសង្កាត់ទំនប់ទឹក ខណ្ឌចំការមន ។
តាមសាក្សី នៅកន្លែងកើតហេតុ បានឲ្យដឹងថា មុនពលកើហេតុ គេបានឃើញរថយន្ត ម៉ាកព្រូស ពណ៌ស ពាក់ស្លាកលេខ ភ្នំពេញ 2AX 0719 បើកបរដោយនារីម្នាក់ធ្វើដំណើរតាមបណ្តោយផ្លូវលេខ១៩៣ក្នុងទិសដៅពីកើតទៅលិច ខណៈមកដល់ចំណុចកើតហេតុ ក៏បានបើកឆ្លងផ្លូវម៉ៅសេទុងស្រាប់តែមានម៉ូតូមួយគ្រឿងម៉ាងហុងដាសេ១២៥ ពណ៍ខ្មៅពាក់ស្លាកលេខកណ្តាល1W 9529 បើកបរដោយបុរសម្នាក់រួមដំណើរនិងគូដណ្តឹងថែមទាំងមិត្តម្នាក់ទៀតធ្វើដំណើរតាមបណ្តោយផ្លូវម៉ៅសេទុងក្នុងទិសដៅពីជើងទៅត្បូងក៏ជ្រុលបុករថយន្តពីចំហៀងពេញទំហឹងបណ្តាលឲ្យ២នាក់គូដណ្តឹងរងរបួសធ្ងន់ ។
បើតាមមិត្តភក្តិ ជនរងគ្រោះបានឲ្យដឹងថា មុនពេលកើតហេតុ រូបគេ និងមិត្តភក្តិបានជិះម៉ូតូចេញ ពីធ្វើការនៅតាមបណ្តោយផ្លូវកម្ពុជាក្រោមបំណងទៅផ្ទះនៅអ្នកលឿងព្រោះព្រឹកឡើងត្រូវភ្ជាប់ពាក្យ ខណៈមកដល់ចំណុចកើតហេតុក៏ជួបគ្រោះថ្នាក់ចរាចរណ៍បែបនេះរងរបួសគូដណ្តឹងទាំង២នាក់តែម្តង ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែកម៉ូតូ និងរថយន្តត្រូវបានសមត្ថកិច្ចធ្វើការវាស់វែងយកទៅរកសាទុកនៅអធិការដ្ឋាននគរបាលខណ្ឌចំការមនរងចាំដោះស្រាយពេលក្រោយ ៕ សុខាសែនជ័យ
