សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់បុរស២នាក់ បានស្លាប់ និង៤នាក់ទៀតរងរបួសធ្ងន់ ដោយសារករណីគ្រោះថ្នាក់ចរាចរណ៍មួយបានកើតឡើងគួរឲ្យរន្ធត់ និងតក់ស្លុតបំផុតបង្កកាភ្ញាក់ផ្អើល ដល់អ្នកភូមិកំពុងដេកលង់លក់ ភ័យស្រឡាំងកាំង ទាំងយប់ ចេញមកមើល និងរាយការណ៍មកសមត្ថកិច្ច ខណៈមានរថយន្ត២គ្រឿងបុកគ្នាលាន់សូរដូចរន្ទះ ។
ហេតុការណ៍នេះ បានកើតឡើងនៅថ្ងៃទី៦ ខែមករា ឆ្នាំ២០១៩ វេលាម៉ោង០៣ និង២៥នាទី នៅចន្លោះគីឡូម៉ែត្រលេខ១៥៩ និង១៦០ ស្ថិតក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង ។
យោងតាមសមត្ថកិច្ចនគរបាលក្រុងបាវិតបានឲ្យដឹងថា រថយន្តបង្កហេតុ ម៉ាកឡិចស៊ីស RX330 ពណ៌ទឹកមាស គ្មានស្លាកលេខ ជិះគ្នា៥នាក់ ដោយអ្នកស្លាប់មានឈ្មោះ អ៊ំ សាវាក់ (ហៅសៅ) ភេទប្រុស អាយុ២៨ឆ្នាំ ជនជាតិខ្មែរ មុខរបរលក់ដូរ រស់នៅភូមិតារាងបាល់ សង្កាត់គយត្របែក ក្រុងស្វាយរៀង ខេត្តស្វាយរៀង ។
អ្នករងរបួសធ្ងន់មានឈ្មោះសៀង បូរ៉ា អាយុ២៥ឆ្នាំ ជនជាតិខ្មែរ មុខរបរលក់ដូរ រស់នៅភូមិតារាងបាល់ សង្កាត់គយត្របែក ក្រុងស្វាយរៀង ឈ្មោះប៉ាង បូរិន អាយុ៣៧ឆ្នាំ ជនជាតិខ្មែរ រស់នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ និ និង០២នាក់ទៀតមិនទាន់ស្គាល់អត្តសញ្ញាណនោះទេ ។
ប្រភពបន្តថា ចំណែកភាគីរថយន្តម្ខាងទៀតម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3B-2272 បើកបរដោយឈ្មោះ ស៊ីណា ផានិត ភេទប្រុស អាយុ៣៧ឆ្នាំ ជនជាតិខ្មែរ មុខរបរបើកបររថយន្ត រស់នៅភូមិតាព្រហ្ម សង្កាត់ព្រែកឯង ក្រុងច្បារអំពៅ រាជធានីភ្នំពេញ (ស្លាប់នៅកន្លែងកើតហេតុ) ។
ប្រភពបញ្ជាក់ទៀតថា មុនពេលកើតហេតុមានរថយន្ត១គ្រឿងម៉ាកឡិចស៊ស RX330 ពណ៌ទឹកមាស គ្មានស្លាកលេខ ជិះគ្នា៥នាក់ពីលិចទៅកើត លើកំណាត់ផ្លូវជាតិលេខ១ក្នុងល្បឿនលឿនលុះមកដល់ចំណុចកើតហេតុខាងលើ ក៏បានបុកប៉ះ នឹងធុងសាំងគំនរដី ដែលការដ្ឋានកំពុងសាងសង់ស្ពាន រួចជ្រុលចង្កូតទៅបុក និងរថយន្តមួយគ្រឿងទៀត ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3B-2272ដែលធ្វើដំណើរពីកើតទៅលិចយ៉ាងពេញ ទំហឹងលាន់សូរដូចរន្ទះបាញ់បង្កការភ្ញាក់ផ្អើលតែម្ដង ។
ក្រោយមកសមត្ថកិច្ចមូលដ្ឋានបានមកដល់អន្តរាគមន៍ យកអ្នករងរបួសបញ្ជូន ទៅព្យាបាលនៅមន្ទីរពេទ្យពន្លឺបូព៌ា និងមន្ទីរពេទ្យបង្អែកខេត្តស្វាយរៀង ។
បច្ចុប្បន្នសាកសពទាំង២នាក់ សមត្ថកិច្ននគរបាលចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃខ្មែរ ព្រមទាំងវាស់វែងអូសយកមធ្យោបាយទាំង២គ្រឿង យកមករក្សាទុកនៅអធិការដ្ឋាននគរបាលក្រុងបាវិត ដើម្បីបំពេញសំណុំរឿងតាមច្បាប់ ៕ យឹម សុថាន
