សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យ៉ាងហោចណាស់ បុរសនិងនារីពីរនាក់បានរងរបួសធ្ងន់ និងបុរសម្នាក់ទៀតបានស្លាប់នៅលើរថយន្តសង្គ្រោះបន្ទាន់ បន្ទាប់ពីជិះម៉ូតូមួយគ្រឿងម៉ាក Waveជិះគ្នាពីរនាក់ត្រូវបានបុរសម្នាក់ជិះម៉ូតូធំមួយគ្រឿងទៀត ក្នុងល្បឿនយ៉ាងលឿន ហើយទៅចំពីមុខពេញទំហឹង កាលពីវេលាម៉ោង០៩:១៥នាទីយប់ ថ្ងៃទី៥ ខែមករា ឆ្នាំ២០១៩ នៅលើកំណាត់មហាវិថីសម្ដេចតេជោ (ហៅផ្លូវ៦០ម៉ែត្រ) ស្ថិតក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុ ពុំមានអ្នកណាម្នាក់បានដឹងច្បាស់ថាភាគីទាំងសងខាងធ្វើដំណើរមកពីណាខ្លះនោះទេ ព្រោះគ្រាន់តែលឺប្រាវ ប្រជាពលរដ្ឋក៏រត់ចេញទៅមើលឃើញ ម៉ូតូទាំងពីរគ្រឿង ដួលនៅហ្នឹងកន្លែងកើតហេតុរួចហើយ ដោយឃើញភាគីខាងម៉ូតូ ម៉ាក Honda Wave ពណ៍ខ្មៅ ពាក់ស្លាកលេខភ្នំពេញ 1FC-5378 ជិះឌុបគ្នាពីរនាក់(បុរសម្នាក់នារីម្នាក់) និងម្ខាងទៀតម៉ូតូធំម៉ាក YAMAHA XT ពាក់ស្លាកលេខភ្នំពេញ 1GV-6048 ជិះដោយបុរសម្នាក់ជាសន្តិសុខ ក្រុមហ៊ុនឯកជន ។ ហើយភាគីទាំងសងខាងបានផ្លោងបោកទៅនឹងថ្នល់ រងរបួសបែកក្បាលហូរឈាមទាំងសងខាង បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋនៅកន្លែងកើតហេតុឈប់ឡានឈប់ម៉ូតូរួចចុះមកមើល និងរាយការណ៍ប្រាប់សមត្ថកិច្ចទាក់ទងរថយន្តសង្គ្រោះមកដឹកយកអ្នករបួសទៅសង្គ្រោះផងដែរ។ បន្តិចក្រោយមកគេឃើញរថយន្តគិលានសង្គ្រោះរបស់គ្លីនិកឯកជនហុងហាក់ បានចុះមកដឹកយកជនរងគ្រោះទាំង២នាក់ យកទៅសង្គ្រោះនៅឯមន្ទីរពេទ្យ រីឯបុរសម្នាក់ទៀតបានស្លាប់ក្នុងរថយន្តសង្គ្រោះបន្ទាន់ ។
បច្ចុប្បន្នក្រោយពេលកើតហេតុ សមត្ថកិច្ចប៉ុស្តិ៍ចាក់អង្រែលើ និងសមត្ថកិច្ចផ្នែកជំនាញបានមកធ្វើការវាស់វែងយកម៉ូតូទាំងពីរគ្រឿងទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រងចាំធ្វើការដោះស្រាយពេលក្រោយ។ ហើយនៅពេលនោះក៏មានសាច់ញាតិជនរងគ្រោះដែលស្លាប់បានមកដល់កន្លែងកើតហេតុ រួចសមត្ថកិច្ចបានធ្វើកំណត់ហេតុប្រគល់សពជនរងគ្រោះ យកស្រុកកំណើតដើម្បីធ្វើបុណ្យតាមប្រពៃណី ៕ ភារ៉ា ដង្កោ
