សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: បុរសម្នាក់ទំនងជាស្រវឹងស្រាបានបើករថយន្តបុកក្បាលនាគពុះចែកទ្រូងផ្លូវបណ្តាលឲ្យដាច់ក្រឡេទៅមុខលែងរួច ។
ហេតុការណ៍នេះបានកើតឡើង កាលពីម៉ោង៨យប់ ថ្ងៃទី០៦ ខែមករា ឆ្នាំ២០១៩ តាមបណ្ដោយផ្លូវលេខ២៧១ ខាងមុខមន្ទីរពេទ្យព្រះកុសុម: ស្ថិតក្នុងសង្កាត់ទឹកថ្លា ខណ្ឌសែនសុខ ។
ប្រភពពត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសម្នាក់បើកបររថយន្តមួយគ្រឿងម៉ាក តូយ៉ូតាព្រូស ពណ៌ទឹកស ពាក់ស្លាកលេខ ភ្នំពេញ 2AA-5028 តាមបណ្ដោយផ្លូវលេខ២៧១ ក្នុងទិសដៅពីជើងទៅត្បូង យ៉ាងលឿន ។ ខណៈមកដល់ចំណុចកើតហេតុ ស្រាប់តែរថយន្ត បានរេចង្កូតទៅបុកនឹងក្បាលនាគពុះចែកទ្រូងផ្លូវចំពេញ បណ្ដាលឲ្យវៀចអស់មួយកង់ ។ ចំណែករថយន្តដាច់ក្រឡេកង់ទៅមុខលែងរួច ។
បន្ទាប់ពីកើតហេតុសមត្ថកិច្ចមូលដ្ឋានចុះមក ដល់ចំណុចកើតហេតុបានទាក់ទងទៅសមត្ថកិច្ចជំនាញចរាចរចុះមកស្ទូចយករថយន្តរួមទាំងអ្នកបើកបរ បញ្ជូនទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ ៕ ជ្រោយពេជ្រ
