សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ សមត្តកិច្ច នគរបាលស្រុកព្រៃនប់ បានឲ្យដឹងថា៖ នៅរសៀលថ្ងៃទី១១ ខែមករា ឆ្នាំ២០១៩ នេះ កម្លាំងអធិការដ្ឋានគរបាលស្រុកព្រៃនប់ បានអនុវត្តដីកាបង្គាប់ឲ្យចាប់ខ្លួន របស់ចៅក្រមស៊ើបសួរនៃសាលាដំបូងខេត្តព្រះសីហនុ លេខ១១៥០ ដចខ/១៤ ចុះថ្ងៃទី២០-០៩-២០១៥ ដែលបង្គាប់ឲ្យចាប់ខ្លួន ឈ្មោះ អាន ផាន់ ភេទប្រុសអាយុ ២៨ ឆ្នាំ មុខរបរមិនពិតប្រាកដ មានទីលំនៅ ភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ ពីបទហិង្សាដោយចេតនា ប្រព្រឹត្តនៅភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ កាលពីថ្ងៃទី ០៤-០៩-២០១៤ (ដោយអនុវត្តន៍បានសំរេចទាំងស្រុង) ។
លោកវរសេនីយ៍ត្រី អ៊ួង វុទ្ធី អធិការរង នគរបាលស្រុកព្រៃនប់ទទួលការងារព្រហ្មទណ្ឌ បានបញ្ជាក់បន្ថែមថា ៖ កាលពីជាងបួនឆ្នាំមុន ក្នុងយប់ថ្ងៃទី៤ខែកញ្ញា ឆ្នាំ២០១៤ មុខសញ្ញាឈ្មោះ អាន ផាន់ បានផឹកស៊ី ក្នុងហាងមួយកន្លែង នៅភូមិវាលមាស ឃុំវាលរេញ ស្រុកព្រៃនប់ ហើយមានជំលោះជាមួយភាគីម្ខាងទៀត ពេលនោះ ឈ្មោះអាន ផាន់ បានទៅហៅបងប្អូនជាច្រើននាក់ ជិះឡានកូរ៉េមួយគ្រឿង មកព័ទ្ធវាយគូជម្លោះ ដល់មុខហាងផឹកស៊ី បណ្ដាលឲ្យរងរបួសធ្ងន់ ។ កាលណោះ សមត្ថកិច្ចបានចាប់ខ្លួនពួកគេ បានម្នាក់ ដោយឡែកឈ្មោះអាន ផាន់ និងគ្នីគ្នាផ្សេងទៀត បានរត់គេចខ្លួនចេញពីមូលដ្ឋានអស់ទៅ ។
លោកអ៊ួង វុទ្ធី បានបន្ថែមថា ៖ ថ្មីៗនេះ ឈ្មោះអាន ផាន់ បានលេចមុខលិបលៗក្នុងមូលដ្ឋាន ព្រមទាំងធ្លាប់ស្ទាក់វាយសមត្ថកិច្ចទៀតផង ហើយថ្ងៃនេះទំរាំតែឃាត់ខ្លួនបាន សមត្ថកិច្ចនគរបាលស្រុកព្រៃនប់ ប្រើកម្លាំងច្រើននាក់ ទើប ព័ទ្ធចាប់បាន ៕ ឆ្លាម សមុទ្រ
