សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ យុវជនម្នាក់រយះក្បាលយ៉ាងវែងនិងម្នាក់ទៀតបាក់ជើងដោយសាររថយន្តមិនស្គាល់ម៉ាកមួយគ្រឿងបើកកៀរឲ្យដួលបោកទៅនឹងថ្នល់ ខណៈយុវជនទាំងពីរនាក់ជិះម៉ូតូឌុបគ្នាត្រឡប់ទៅផ្ទះវិញ ហៀយត្រូវបានសមត្ថកិច្ចមូលដ្ឋានបញ្ជូនទៅកាន់មន្ទីរពេទ្យភ្លាមៗ។
ឧបទ្ទវហេតុគ្រោះថ្នាក់ចរាចរណ៍នេះកើតឡើងកាលពីវេលាម៉ោង៧និង៣០នាទីយប់ ថ្ងៃសុក្រ ១៣កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៨ខែមករាឆ្នាំ២០១៩ នៅតាមបណ្តោយផ្លូវជាតិលេខ៥ ស្ថិតក្នុងក្រុមទី១១ ភូមិថ្នល់បត់ ឃុំ ឫស្សីក្រាំង ស្រុកមោងឫស្សីខេត្តបាត់ដំបង។
មន្ត្រីនគរបាល ស្រុកមោងឫស្សី បានឲ្យដឹងថា យុវជនទាំងពីរនាក់ដែលរងរបួសធ្ងន់មានឈ្មោះ ចាន់ថា ចន្ធូ អាយុ អាយុ២១ឆ្នាំ រយះក្បាលប្រវែង១០សង់ទីម៉ែត្រ និងអ្នកជិះខាងក្រោយឈ្មោះញាន មិត្ត អាយុ២៥ឆ្នាំរបួសបាក់ជើងខាងឆ្វេង។ទាំងពីរនាក់រស់នៅភូមិថ្នល់បត់ ឃុំ ឫស្សីក្រាំង ស្រុកមោងឫស្សី ត្រូវសមត្ថកិច្ចដឹកទៅសង្គ្រោះនៅមន្ទីរពេទ្យបង្អែកស្រុកភ្លាមៗ ។
ចំណែករថយន្តបង្កមិនស្គាល់ម៉ាកនិងមិនស្គាល់អត្តសញ្ញាណអ្នកបើកបរ ព្រោះក្រោយកើតហេតុបានបើករថយន្តរត់គេចបាត់ស្រមោល។
សាក្សីបានឲ្យដឹងថា មុនពេលកើតហេតុជនរងគ្រោះទាំង២នាក់ជិះម៉ូតូ ១គ្រឿងម៉ាកហុងដាសេ125ពណ៌ខ្មៅស៊េរី2017ពាក់ស្លាកលេខបាត់ដំបង-1X 9929 តាមបណ្តោយផ្លូវជាតិលេខ៥ទិសភ្នំពេញទៅបាត់ដំបងក្នុងទិសដៅស្របគ្នាជាមួយរថយន្ត។ លុះមកដល់កន្លែងកើតហេតុរថយន្ត មិនស្គាល់ម៉ាកមួយគ្រឿងបានកៀរ ម៉ូតូយុវជនទាំងពីរនាក់ ឲ្យដួល រួចរថយន្តបង្កបានគេចខ្លួនបាត់ទៅ ៕ សហការី
