សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ប្រុសស្រី២នាក់បានរងរបួសធ្ងន់សន្លប់ស្ដូកស្ដឹង និងកន្លែងដោយសារករណីគ្រោះថ្នាក់ចរាចរណ៍ រវាងរថយន្តបុកជាមួយម៉ូតូស្របទិសគ្នាយ៉ាងពេញទំហឹងលាន់ដូចរន្ទះបង្កការភ្ញាក់ផ្អើលដល់អ្នកភូមិកាលពីថ្ងៃ អាទិត្យ ១៥ កើត ខែ បុស្ស ឆ្នាំច សំរឹទ្ធិស័ក ព.ស ២៥៦២ ត្រូវ និងថ្ងៃទី ២០ ខែ មករា ឆ្នាំ ២០១៩ វេលាម៉ោង ៨:៣៥ នាទីយប់ លើផ្លូវជាតិលេខ ០១ ចន្លោះគីឡូម៉ែតលេខ ១២៤ និង១២៥ ស្ថិតក្នុងភូមិ កៀនសាំង សង្កាត់ ស្វាយរៀង ក្រុង ស្វាយរៀង ។
យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា បុរសដែលរងគ្រោះមានឈ្មោះឃួន សំអុន ភេទ ប្រុស អាយុ ៥៦ ឆ្នាំ មុខរបរ គ្រូបង្រៀន រស់នៅភូមិ ញរ ឃុំ ញរ ស្រុក កំពង់រោទិ៍ ខេត្ត ស្វាយរៀង និងអ្នករួមដំណើរមានឈ្មោះ សេក ថុណា ភេទ ស្រី អាយុ ៣៨ ឆ្នាំ មុខរបរ កម្មកររោងចក្រ រស់នៅភូមិ ស្វាយអាណាត ឃុំ ញរ ស្រុក កំពង់រោទិ៍ ខេត្ត ស្វាយរៀង ។
ចំណែកអ្នកបើករថយន្តមិនត្រូវបានស្គាល់ឈ្មោះនោះទេ ក្រោយកើតហេតុបានរត់គេចខ្លួនបន្សល់តែរថយន្ដម៉ាក្ស LEXUS ពណ៌ ស ពាក់ស្លាកលេខ ភ្នំពេញ ២AE ២៣៨៦។
តាមសាក្សីបានឲ្យដឹងថា មុនកើតហេតុមានប្រុស ស្រី២នាក់ បានជិះម៉ូតូមួយគ្រឿងម៉ាកហុងដា Wave ពណ៌ ខ្មៅ ពាក់ស្លាកលេខ រដ្ឋ.១៦.១.១២២៩ លើកំណាត់ផ្លូវជាតិលេខ១ក្នុងទិសដៅពីលិចទៅកើត ខណៈនោះស្រាប់តែមានរថយន្ដម៉ាក LEXUS ពណ៌ ស ពាក់ស្លាកលេខ ភ្នំពេញ ២AE ២៣៨៦ក្នុងទិសដៅស្របគ្នាក៏បុកគ្នាយ៉ាងពេញទំហឹងបង្កការភ្ញាក់ផ្អើលដល់អ្នកភូមិតែម្ដង ។
ក្រោយមកអ្នករងរបួសធ្ងន់ត្រូវបានសមត្ថកិច្ចនគរបាលបញ្ជូនមកមកមន្ទីរពេទ្យខេត្តស្វាយរៀងដើម្បីសង្គ្រោះជីវិត និងវាស់វែងរកខុសត្រូវថាតើខាងរថយន្តឬក៏ខាងម៉ូតូជាអ្នកខុសចំណែកមធ្យោបាយទាំង២គ្រឿងត្រូវរ្សាទុកនៅការិយាល័យចរាចរណ៍ខេត្តស្វាយរៀងដើម្បីដោះស្រាយតាមច្បាប់ ៕ យឹម សុថាន
