សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសជនជាតិចិន និងម៉ាឡេស៊ី២នាក់បានរងរបួសធ្ងន់ ស្រាលដោយសារករណីគ្រោះថ្នាក់ចរាចរណ៍ គួរឲ្យរន្ធត់ បន្ទាប់ពីបើក រថយន្ត LEXUS RX ៣០០ ទំនងងងុយដេក រេចង្កូតបុកចូលមុខផ្ទះប្រជាពលរដ្ឋ បង្កការភ្ញាក់ផ្អើលដល់អ្នកភូមិ ក៏ដូចជាម្ចាស់ផ្ទះភ័យលោះព្រលឹងចុងសក់ចេញមកមើល និងរាយការណ៍មកសមត្ថកិច្ចមូលដ្ឋាន ។
ហេតុការណ៍នេះ បានកើតឡើងកាលពីថ្ងៃ ព្រហស្បតិ៍ ០៤ រោច ខែ បុស្ស ឆ្នាំច សំរឹទ្ធិស័ក ព.ស ២៥៦២ ត្រូវ និងថ្ងៃទី ២៤ ខែ មករា ឆ្នាំ ២០១៩ វេលាម៉ោង ៤:៤៥ នាទី ទាបភ្លឺ លើផ្លូវជាតិលេខ ០១ ចន្លោះគីឡូម៉ែតលេខ ១២៧ និង១២៨ ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុង ស្វាយរៀង ។
យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា បុរសដែលរងរបួសមានឈ្មោះតឹង ស៊ូសុីង ភេទ ប្រុស អាយុ ២៨ មុខរបរ IT (ជនជាតិ ម៉ាឡេសុី) រស់នៅភូមិ មិនស្គាល់ សង្កាត់ បាវិត ក្រុង បាវិត ខេត្ត ស្វាយរៀង និងអ្នករួមដំណើរមានឈ្មោះ សឹង ហ្វា ភេទ ប្រុស អាយុ ២៩ ឆ្នាំ(ជនជាតិចិន) មុខរបរ IT រស់នៅភូមិសង្កាត់ជាមួយគ្នា ខណៈរថយន្ដម៉ាក្ស LEXUS RX ៣០០ ពណ៌ ស្ករ ពាក់ស្លាកលេខ ភ្នំពេញ ២AI ៣២៣៧ ខូចខាតយ៉ាងដំណំ ខណៈផ្ទះដែលរថយន្តបុកមិនខូចខាតធ្ងន់នោះទេ ។
សមត្ថកិច្ចនគរបាលបន្តថាមុនកើតហេតុមានរថយន្តមានបុរស២នាក់បានជិះរថយន្តមួយគ្រឿងដម៉ាក្ស LEXUS RX ៣០០ ពណ៌ ស្ករ ពាក់ស្លាកលេខ ភ្នំពេញ ២AI ៣២៣៧ ដោយធ្វើដំណើរលើកំណាត់ផ្លូវជាតិលេខ១ពីលិចទៅកើត ខណៈនោះមិនដឹងយ៉ាងម៉េច ទំនងអ្នកបើកងងុយដេកក៏ជ្រុលចង្កូតធ្លាក់ផ្លូវ បុកចូលផ្ទះប្រជាពលរដ្ឋបង្កការភ្ញាក់ផ្អើលតែម្ដង ។
ក្រោយមកសមត្ថកិច្ចមូលដ្ឋានបានមកដល់ជួយសង្គ្រោះ ដឹកជនរងគ្រោះទាំង២នាក់មកសម្រាកព្យាបាលនៅមន្ទីរពេទ្យខេត្តស្វាយរៀង ។
សមត្ថកិច្ចនគរបាលបានបញ្ជាក់ថា មូលហេតុដោយសារតែអ្នកបើកបររថយន្ដ LEXUS RX ៣០០ ងងុយដេកទើបបង្កឲ្យមានករណីនេះកើតឡើង៕ យឹម សុថាន
