សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់មនុស្សប្រុស ស្រី៣នាក់ បានរងរបួសធ្ងន់ និងស្រាល នៅក្នុងករណីគ្រោះថ្នាក់ចរាចរណ៍មួយ រវាងម៉ូតូបុករថយន្តធុនធំចតលើទ្រូងផ្លូវស្របហើយ ក៏មានម៉ូតូរ៉ឺម៉កដឹកដែកបើកគេចពីករណីនៅខាងមុខធ្លាក់ដែក ចូលតូបលក់បាយប៉ើងខ្ទេចកាលពីវេលាម៉ោង១០ព្រឹក ថ្ងៃទី២៧ ខែ មករា ឆ្នាំ២០១៩ នៅចំណុចផ្លូវជាតិលេខ០១ ស្ថិតក្នុងភូមិ ប្រសូត្រ២ ឃុំកណ្តៀងរាយ ស្រុក ស្វាយទាប ខេត្តស្វាយរៀង ។
សមត្ថកិច្ចនគរបាលស្រុកស្វាយទាបបានឲ្យដឹងថា នៅមុនពេលកើតហេតុមានម៉ូតូកង់បីម៉ាកស៊ីរុស ពណ៌ខ្មៅស ស្លាកលេខគ្មាន បើកបរដោយឈ្មោះ នាគ ថុល ភេទប្រុស អាយុ៣៧ឆ្នាំ មុខរបរកសិករ រស់នៅភូមិបុស ឃុំមេសថ្ងក ស្រុកចន្ទ្រា ខេត្តស្វាយរៀង រងរបួសស្រាល (ពាក់មួកសុវត្ថិភាព)បានជិះម៉ូតូក្នុងទិសដៅពីលិចទៅកើត ។
ប្រភពបន្តថា លុះមកដល់កន្លែងកើតហេតុខាងលើ បានមកបុកម៉ូតូម៉ាកហុងដាឌ្រីម សេ១២៥ ស៊េរីឆ្នាំ ២១០៣ ពណ៌ ខ្មៅ ពីក្រោយ បើកបរដោយឈ្មោះ វែន ផល្លា ភេទស្រី អាយុ ២៥ឆ្នាំ មុខរបរកសិករ រស់នៅភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង រងរបួសធ្ងន់ (ពាក់មួក) អ្នករួមដំណើរម្នាក់ឈ្មោះ កឹម អិត ភេទស្រី អាយុ៤៣ឆ្នាំ មុខរបរកសិករ រស់នៅភូមិឃុំជាមួយគ្នា រងរបួសធ្ងន់ ក្នុងទិសដៅពីលិចទៅកើត ។
ក្រោយមកស្រាប់តែមាន ម៉ូតូកង់បីក៏ជ្រុលទៅបុកគូថរថយន្តម៉ាក ហ៊ីយ៉ាន់ដាយ ពណ៌ខៀវ ស្លាកលេខគ្មាន ដែលឈប់នៅលើទ្រូវផ្លូវ បើកបរដោយឈ្មោះ ប៉ា ភេទប្រុស អាយុ ៣៤ឆ្នាំ មុខរបរ បើកបរ រស់នៅភូមិ តាយន្ត ឃុំពងទឹក ស្រុករំដួល ខេត្តស្វាយរៀង(អ្នកបើកបររត់បាត់ពីកន្លែងកើតហេតុ) ភ្លាមនោះក៍មានម៉ូតូរ៉ឺម៉ក ម៉ាក ដាយមីត ពណ៌ខ្មៅ ស្លាកលេខគ្មាន ក៏គេចពីគ្រោះថ្នាក់នេះហើយរបូតដែកដែលដឹកនៅលើរ៉ឺម៉កបានដែកទៅលើចង្ក្រានអ្នកលក់បាយ បើកបរដោយឈ្មោះ តូច ចាន់កុមារ ភេទប្រុស អាយុ៣៦ ឆ្នាំ មុខរបរកសិករ រស់នៅភូមិ សាលារៀន ឃុំ បាសាក់ ស្រុកស្វាយជ្រំ ខេត្តស្វាយរៀង គ្មានរបួសស្នាម ។
អ្នករងរបួសទាំងសងខាងបានបញ្ជូនទៅព្យាបាលនៅមន្ទីរពេទ្យបង្អែកស្រុកស្វាយទាប ចំពោះមធ្យោបាយទាំង៣គ្រឿង យកមករក្សាទុកនៅអធិការដ្ឋាន នគរបាលស្រុកស្វាយទាប ដើម្បីចាត់ការទៅតាមផ្លូវច្បាប់៕ យឹម សុថាន
