សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តហាយឡែនឌ័រ មួយគ្រឿង បើកបោះពួយលឿនជ្រុលទៅបុកពីក្រោយ ម៉ូតូរ៉ឺម៉ក លក់កញ្ច្រែង ចាន ឆ្នាំង ទូផ្តៅ ក្រឡាប់ផ្ងារជើង ហើយបន្ថែមល្បឿន ក្នុងបំណងបើករត់ តែមិនរួចជ្រុលទៅបុករះ រ៉ឺម៉កម៉ូតូដឹកប្រេង ររថយន្តនិងម៉ូតូ២គ្រឿងបន្ថែមទៀត ទើបបែកកង់ទៅមុខលែងរួច បណ្តាលឲ្យមនុស្ស៤នាក់រងរបួសធ្ងន់ស្រាល ជនបើករថយន្តបង្កត្រូវបានឃាត់ខ្លួន ។
ហេតុការណ៍នេះបានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី០២ ខែកុម្ភៈ ឆ្នាំ២០១៩ ស្ថិតនៅលើកំណាត់ផ្លូវជាតិលេខ៤ ភូមិផ្សារកំបូល សង្កាត់កំបូល ខណ្ឌពោធិសែនជ័យ ។
សាក្សីនៅកន្លែងកើតហេតុបានឲ្យដឹងថាមុនពលកើតហេតុគេឃើញ រថយន្ត មួយគ្រឿង ម៉ាកហាយឡែនឌ័រ ពណ៌ស្ករ ពាក់ស្លាកលេខ ខេមរភូមិន្ទ09 2-9664 បើកបរដោយបុរសម្នាក់ បើកល្បឿនពីកើតទៅលិច លុះដល់ចំណុចកើតហេតុ បានជ្រុលទៅបុកពីក្រោយ រ៉ឺម៉កម៉ូតូ លក់ទូផ្តៅ ចាន ឆ្នាំង ក្រឡាប់ផ្ងារជើង ហើយរថយន្តមិនបានឈប់ឡើយ បន្ថែមល្បឿនបើករត់គេច តែមិនរួច ទៅមិនផុត បានចំងាយប្រមាណ១០០ម៉ែត្រ ក៏ជ្រុលបុករះ រ៉ឺម៉កម៉ូតូដឹកប្រេង បុករថយន្ត កាមរីបាឡែន ពណ៌ស ពាក់ស្លាកលេខ ភ្នំពេញ 2AK-7107 ម៉ូតូសេ១២៥ ពណ៌ខ្មៅ សេរី២០៦ ពាក់ស្លាកលេខ ភ្នំពេញ 1DC- 2101 និងម៉ូតូ MSX មួយគ្រឿងទៀត ។
ក្នុងហេតុការណ៍ខាងលើ បង្កឲ្យមនុស្សចំនួន៤នាក់រងរបួស ៣នាក់របួសធ្ងន់ ម្នាក់ទៀតរងរបួសស្រាល ចំណែកអ្នកបើកបររថយន្តបង្ក ចុះរត់អត់រួច ត្រូវបានបងប្អូនប្រជាពលរដ្ឋព័ទ្ធចាប់ក្របួចជាប់ ប្រគល់ឲ្យប៉ូលីស ។
ក្រោយកើតហេតុ ជនរងគ្រោះត្រូវបានបញ្ជូនទៅមន្ទីរពេទ្យ ចំណែក រថយន្ត២គ្រឿង រ៉ឺម៉កម៉ូតូ២គ្រឿង ម៉ូតូចំនួន២គ្រឿង រួមទាំងជនបើករថយន្ត បង្កផង ត្រូវបានប្រគល់ឲ្យការិយាល័យចរាចរណ៍ជើងគោក ប្រមូលដឹកយកទៅរក្សាទុក ដើម្បីកសាងសំណុំរឿងតាមនីតិវិធី ៕ សុខាសែនជ័យ
