សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានអគ្គិភ័យមួយបានឆាបឆេះតូបលក់សំលៀកបំពាក់ និងតូបលក់ស្បែកជើងនិងកាបូបមួយកន្លែងនៅក្នុងសួនឧទ្យានសុបិន្តចំការព្រីង ដោយបង្កការភ្ញាក់ផ្អើលដល់បងប្អូនប្រជាពលរដ្ឋ និងម្ចាស់តូបរាយការណ៍ប្រាប់សមត្ថកិច្ច មូលដ្ឋានហៅរថយន្តពន្លត់អគ្គិភ័យចុះមកអន្តរាគមន៍ភ្លាមៗផងដែរ។
ហេតុការណ៍អគ្គិភ័យនេះ បានកើតមានឡើងនៅវេលាម៉ោង១០និង៣០នាទីយប់ ថ្ងៃអង្គា ទី០៥ ខែកុម្ភៈ ឆ្នាំ២០១៩ នៅចំណុចតូបលក់សំលៀកបំពាក់ ក្នុងបរិវេណឧទ្យានសុបិនចំការព្រីង ស្ថិតក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ២តូបដែលឆេះម្ចាស់តែមួយមានឈ្មោះ ថាច់ ចិន្តាម្លិៈ ភេទស្រី អាយុ៣៤ឆ្នាំ ជនជាតិខ្មែរ មុខរបរលក់ខោអាវ និងស្បែកជើង ស្នាក់នៅសង្កាត់គោកឃ្លាង។
សាក្សីដែលឃើញហេតុការណ៍ផ្ទាល់បានរៀបរាប់ប្រាប់ឲ្យដឹងថា នៅមុនពេលកើតហេតុ គេបានឃើញមានផ្សែងហុយចេញពីខាងក្នុងតូបលក់ខោអាវខាងលើ ទើប នាំគ្នាស្រែកឆោឡោរយកបំពង់ពន្លត់អគ្គិភ័យមកបាញ់ពន្លត់អស់០៣បំពង់ តែមិនរលត់ ទើបរាយការណ៍ប្រាប់សមត្ថកិច្ចមូលដ្ឋានចុះមកពិនិត្យមើលជាក់ស្ដែង ។
បន្ទាប់ពីទទួលបានដំណឹងនេះភ្លាមលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានដឹកនាំកម្លាំងចុះអន្តរាគមន៍ និងទាក់ទងរថយន្តពន្លត់អគ្គិភ័យមកអន្តរាគមន៍ផងដែរ។
ចំពោះមូលហេតុទុស្សេខ្សែភ្លើង បណ្ដាលឲ្យឆេះរាលដាលឡើង និងខូចខាតសំភារៈ តូបលក់សំលៀកបំពាក់ចំនួន ២តូប និងតូបលក់ស្បែកជើងនិងសំភារៈផ្សងៗមួយចំនួនទៀត ។
ប្រតិបត្តិការពន្លត់អគ្គិភ័យខាងលើនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន០២គ្រឿង ដោយពន្លត់រហូតរលត់ទាំងស្រុង នៅម៉ោង១១យប់ថ្ងៃដដែលនេះ ៕ ភារ៉ា ដង្កោ
