សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានហេតុការណ៍ភ្ញាក់ផ្អើលមួយបានកើតឡើង ដោយរថយន្តឡិចសុីស៥៧០មួយគ្រឿង ដែលម្ចាស់ស្រវឹងស្រា បានបើកទៅបុកនឹងខឿនសួនច្បារ ពុះចែកផ្លូវ យ៉ាងពេញទំហឹង បណ្តាលឲ្យបែកកង់ ក្រឡាប់ផ្ងារជើងមួយចំហៀង តែមិនមានគ្រោះថ្នាក់ដល់ ដែលជិះនៅក្នុងរថយន្ត និងអ្នកដំណើរនោះទេ។
ហេតុការណ៍នេះដែរបានកើតឡើង នៅវេលាម៉ោង១និង៣០នាទី រំលងអធ្រាត្រ ឈានចូលថ្ងៃពុធ ទី៦ ខែកុម្ភៈ ឆ្នាំ២០១៩ ចំណុចគល់ស្ពានមុនីវង្សចាស់ ត្រើយខាងកើត ផ្លូវជាតិលេខ១ សង្កាត់ច្បារអំពៅ២ ខណ្ឌច្បារអំពៅ ។
បើតាមប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសបីនាក់ ដែលគេស្គាល់ថា ជាកូនថៅឈើ នៅច្បារអំពៅ បានបើករថយន្ត ម៉ាកឡិចសុីស ៥៧០ ពណ៌ស ពាក់ស្លាកលេខ ភ្នំពេញ 2U-0777 បានធ្វើដំណើរតាមផ្លូវ ជាតិលេខ១ ក្នុងទិសដៅ ពីកើតទៅលិច ក្នុងល្បឿនលឿន ដូចហោះ ព្រមទាំងស្រវឹងផងនោះ ខណៈមកដល់ចំនុចកើតហេតុ ក៏ស្រាប់តែរេចង្កូត ទៅខាងឆ្វេងដៃ ជ្រុលទៅបុកនឹងខឿនសួនច្បារពុះចែកផ្លូវ យ៉ាងពេញទំហឹង បណ្តាលឲ្យ បែកកង់និងកំពិតខាងឆ្វេង ធ្វើឲ្យរថយន្ត ក្រឡាប់ផ្ងារជើងមួយចំហៀង តែមិនបង្ករគ្រោះថ្នាក់ដល់មនុស្សដែលជិះនៅក្នុងរថយន្ត និងអ្នកនៅក្បែរកន្លែងកើតហេតុនោះទេ ហើយភ្លាមនោះដែរ អ្នកបើកបរ ដែលមានជាតិស្រវឹងទោរទន់រូបនោះ ត្រូវបានសមត្ថកិច្ចប៉ុស្តិនគរបាលច្បារអំពៅ២ឃាត់ខ្លួន តែការឃាត់ខ្លួននេះ មិនបានដឹកជនបង្កបើកបរយកទៅប៉ុស្តិ៍នគរបាលនោះទេ គឺដឹកអ្នកបើកបរយកទៅផ្ទះតែម្តង ។
ក្រោយពេលកើតហេតុ រថយន្តបង្កត្រូវបានសមត្ថកិច្ច ឲ្យម្ចាស់ស្ទូចយកទៅជួសជួលដោយខ្លួនឯង ដោយមិនខ្វល់ពីការខូចខាតសម្បត្តិរបស់រដ្ឋនោះឡើយ ៕ ភារ៉ា ដង្កោ
