សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់ក្នុងចំណោមបក្ខពួកជាច្រើននាក់ ត្រូវសមត្ថកិច្ចប៉ុស្តិ៍នគរបាលទំនប់ទឹក ឃាត់ខ្លួនប្រគល់ឲ្យសមត្ថកិច្ចប៉ុស្តិ៍នគរបាលស្ទឹងមានជ័យ២ សាកសួរបន្ទាប់ពីជនសង្ស័យរូបនោះយកដំថ្មគប់អ្នកដំណើរតាមផ្លូវ បង្កឲ្យមានការភ្ញាក់ផ្អើលកាលពីម៉ោង១និង១០នាទីរំលងអធ្រាត្រ ឈានចូលថ្ងៃទី៨ ខែកុម្ភៈ ឆ្នាំ២០១៩ ជិតគល់ស្ពានអាកាសស្ទឹងមានជ័យ ផ្លូវ២៧១ សង្កាត់ស្ទឹងមានជ័យ២ ខណ្ឌមានជ័យ ។
សមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនមានឈ្មោះ លឹម សេងស្រៀង ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ចំណែកបក្ខពួកជាច្រើននាក់ទៀតមិនបានឲ្យស្គាល់ឈ្មោះបានរត់គេខ្លួនបាត់ សមត្ថកិចកបន្តថា ជនរងគ្រោះឈ្មោះ រិទ្ធី ភេទប្រុស អាយុ២០ឆ្នាំ មុខរបរលក់បន្លែនៅផ្សារដើមគ ស្នាក់នៅសង្កាត់ផ្សារដើមគ ខណ្ឌទួលគោក ។
តាមសម្តីជនរងគ្រោះបានឲ្យដឹងថា មុនកើតហេតុ ពួកគាត់មានគ្នា៥នាក់បានជិះម៉ូតូ៣គ្រឿង បានចេញពីម្តុំបឹងសាឡាង សង្កាត់បឹងសាឡាង ខណ្ឌទួលគោក គោលបំណងជូនមិត្តភក្តិទៅក្រុងតាខ្មៅ ខេត្តកណ្តាល ដោយធ្វើដំណើរតាមផ្លូវ២១៧ ខណៈមកដល់ចំណុចកើតហេតុស្រាប់តែមានជនសង្ស័យមួយក្រុមមានគ្នាជាង១០នាក់ បានពួននៅច្រកឌឿងហែម ជាកន្លែងងងឹត ហើយយកដុំថ្មគប់មកលើពួកគាត់ បណ្តាលឲ្យចំម៉ូតូ និងក្បាល បំណងចង់ប្លន់យកម៉ូតូ តែសំណាងល្អពួកគាត់មានមួកការពារសុវត្ថិភាពជួយ ។ ភ្លាមៗនោះដែរ ចៃដន្យមានកម្លាំងសមត្ថកិច្ចប៉ុស្តិ៍នគរបាលទំនប់ល្បាតឆ្លងកាត់ទីនោះ ឃើញក៏ឃាត់បានបុរសម្នាក់ ចំណែកបក្ខពួកជាច្រើននាក់ទៀតបាត់រត់គេចអស់ ។
ភ្លាមៗនោះដែរ សមត្ថកិច្ចប៉ុស្តិ៍ទំនប់បានសាកសួរថា ករណីកើតហេតុនៅទឹកដីសង្កាត់ស្ទឹងមានជ័យ២ ខណ្ឌមានជ័យ ទើបសមត្ថកិច្ចបានប្រគល់ជនសង្ស័យ និងជនរងគ្រោះឲ្យទៅសមត្ថកិច្ចប៉ុស្តិ៍នគរបាលស្ទឹងមានជ័យ២ ដើម្បីសាកសួរ និងដាក់ពាក្យបណ្តឹងទៅតាមច្បាប់ ៕ ធឿនព្រែកជ័យ
