លោកតាម្នាក់ជិះកង់ឆ្លងផ្លូវ មិនប្រយ័ត្ន បណ្ដាលឲ្យរថយន្តមួយគ្រឿង មកពីក្រោយបុកបណ្ដាលឲ្យស្លាប់យ៉ាងអាណោចអាធ័ម

ខេត្តកណ្ដាល៖ លោកតាអាយុ៨១ឆ្នាំម្នាក់ ជិះកង់ឆ្លងផ្លូវមិនប្រយ័ត្ន ត្រូវរថយន្តមួយគ្រឿងបើកមកពីក្រោយល្បឿនលឿន បានបុកពីក្រោយពេញមួយទំហឹង បណ្ដាលឲ្យលោកតាជាអ្នកជិះកង់ស្លាប់ភ្លាមៗនៅកន្លែងកើតហេតុ ។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង០៦និង៣០នាទីព្រឹក ថ្ងៃទី១២ ខែកុម្ភៈ ឆ្នាំ២០១៩ ចំណុចផ្លូវលេខ២១​ ស្ថិតនៅភូមិស្វាយជួរ ឃុំកោះខែល ស្រុកស្អាង​ ខេត្តកណ្តាល ។

មន្ត្រីនគរបាលចរាចរណ៍ស្រុកស្អាងបានឲ្យដឹងថា លោកតារងគ្រោះបាត់បង់ជីវិតឈ្មោះ វណ្ណ ជ័យ ភេទប្រុស អាយុ៨១ឆ្នាំ មុខរបរជាអាចារ្យការ មានទីលំនៅភូមិទេពអរជូន ឃុំកោះខែល ស្រុកស្អាង ខេត្តកណ្ដាល ។ ចំណែករថយន្តម៉ាកសាំយ៉ុង ពណ៍ស-បៃតង​ ពាក់ស្លាកលេខ ភ្នំពេញ2K-9058 បើកបរដោយជនមិនស្គាល់អត្តសញ្ញាណ រត់គេចខ្លួនបាត់ស្រមោល ។

ប្រភពដដែលបន្តថា នៅមុនពេលកើតហេតុ សាក្សីបានឃើញលោកតារងគ្រោះជិះកង់តាមបណ្ដោយផ្លូវជាតិលេខ២១ ក្នុងទិសដៅពីត្បូងទៅជើង លុះជិះមកដល់កន្លែងកើតហេតុ ជនរងគ្រោះបានជិះកង់បត់ឆ្វេងឆ្លងផ្លូវ ខណៈនោះក៏មានរថយន្តមួយគ្រឿងបើកល្បឿនលឿនមកពីក្រោយ ក៍ឈប់មិនទាន់បានបុកលោកតារងគ្រោះពេញមួយទំហឹង បណ្ដាលឲ្យលោកតារងគ្រោះស្លាប់ភ្លាមៗនៅកន្លែងកើតហេតុ រីឯអ្នកបើកបររថយន្តបានទុករថយន្តចោល រួចរត់គេចខ្លួនបាត់ស្រមោល ។

ក្រោយពីមានហេតុការណ៍កើតឡើង នគរបាលជំនាញចរាចរណ៍ស្រុកបានចុះមកពិនិត្យវាស់វែង និងកសាងឯកសារដកហូតយកមធ្យោបាយពាក់ព័ន្ធទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ។ ចំណែកសាកសពជនរងគ្រោះត្រូវបាននគរបាលប្រគល់ទៅឲ្យគ្រួសារយកទៅចាត់ចែងធ្វើបុណ្យតាមប្រពៃណី ៕ ស្អាងជ័យ