សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងកងរាជអាវុធហត្ថខណ្ឌ៧មករា ឃាត់បានជនសង្ស័យម្នាក់ធ្វើសកម្មភាពឡើងផ្ទះប្រជាពលរដ្ឋ ប៉ងលួចទ្រព្យសម្បត្តិទាំងកណ្តាលយប់ នៅចំណុចម្តុំបុរីកីឡា ភ្នំពេញ នៅម៉ោង៣៖៣០នាទីរំលងអធ្រាត្រ ឈានចូលថ្ងៃទី១៩ ខែកុម្ភៈ ឆ្នាំ២០១៩ នៅតាមបណ្ដោយផ្លូវ២១៥ ស្ថិតក្នុងសង្កាត់ វាលវង់ ខណ្ឌ ៧មករា រាជធានីភ្នំពេញ ។
មន្រ្តីអាវុធហត្ថបានឲ្យដឹងថា ជនសង្ស័យឈ្មោះ ឌឺ ដារិទ្ធ អាយុ៣០ឆ្នាំ បច្ចុប្បន្នស្នាក់នៅខណ្ឌទួលគោក ។
កងរាជអាវុធហត្ថខណ្ឌ ៧មករា បានឲ្យដឹងថា មុនឃាត់ខ្លួនជនសង្ស័យ គឺកម្លាំងបានល្បាតក្នុងមូលដ្ឋាន ដើម្បីការពារសុវត្ថិភាព ខណៈមកដល់ចំណុចផ្លូវលេខ២១៥ ម្តុំបុរីកីឡា ស្រាប់តែប្រទះឃើញ ជនសង្ស័យកំពុងតែធ្វើសកម្មភាពឡើងផ្ទះរបស់បងប្អូនប្រជាពលរដ្ឋ ភ្លាមៗនោះកម្លាំងយើងបានចុះទៅអន្តរាគមន៍ ឃាត់ខ្លួនជនសង្ស័យភ្លាមៗ រួចក៏បញ្ជូនជនសង្ស័យមកសួរនាំនៅមូលដ្ឋានកងរាជអាវុធហត្ថខណ្ឌ៧មករា។
វត្ថុតាងដកហូតរួមមាន ៖ សម្ភារៈគាស់ផ្ទះមួយចំនួន នឹងម៉ូតូម៉ាក ឡែត ១គ្រឿង ពណ៌ស លាយក្រហម ពាក់ស្លាកលេខភ្នំពេញ 1GX-8385។
បច្ចុប្បន្នជនសង្ស័យ ត្រូវបានកម្លាំងកងរាជអាវុធហត្ថខណ្ឌ ៧មករាឃាត់ខ្លួនបណ្តោះអាសន្ន និងកសាងសំណុំរឿង ចាត់ការតាមនីតិវីធី ៕ ជ្រោយពេជ្រ
