សារព័ត៌មាន នគរវត្ត តែងតែនាំមុខគេជានិច្ច
គេរាយការណ៍ថា សកម្មភាពនេសាទល្មើសច្បាប់ ជាពិសេសអូសអួនហ៊ុំ បាននិងកំពុងកើតមានយ៉ាងគគ្រឹកគគ្រេងទាំងយប់ទាំងថ្ងៃដោយគ្មានសមត្ថកិច្ចណាអើពើ និងបង្ក្រាបនោះឡើយ ។ ប្រភពបន្ថែមថា អួនហ៊ុំ បានធ្វើសកម្មភាពនៅស្រុកកណ្តៀង, ស្រុកបាកាន ក៏ដូចជាស្រុកក្រគរជាចំហរ រីឯអាជ្ញាធរមានសមត្ថកិច្ចមិនដែលខ្វល់នឹងបង្ក្រាបបទល្មើសនោះឡើយ ។ កាលពីសប្តាហ៍មុន អាជ្ញាធរមានសមត្ថកិច្ចដ៏ហមហានរបស់ខេត្តពោធិ៍សាត់បានចាប់បង្ក្រាបអ្នកនេសាទល្មើសច្បាប់២១នាក់រួចហើយដោះលែងទៅវិញ បើទោះបីជា ជនទាំងនោះត្រូវគេអះអាងថា បានប្រព្រឹត្តបទល្មើសជាក់ស្តែង ។
បទល្មើសអួនហ៊ុំគឺជាបទល្មើសទ្រង់ទ្រាយធំ ដោយប្រើទូកម៉ាស៊ីនអូសដោយកម្លាំងម៉ាស៊ីន និងអួនហ៊ុំខ្លះបង្កប់ខ្សែភ្លើងឆក់ដល់បាតដី កំពុងធ្វើសកម្មភាពទាំងថ្ងៃ ទាំងយប់ ដោយមិនញញើតចំពោះសមត្ថកិច្ចដ៏ខ្លាំងក្លារបស់ខេត្តពោធិ៍សាត់នោះឡើយ ។ ការដែលពួកអ្នកនេសាទល្មើសច្បាប់ទាំងនោះមិនខ្លាចសមត្ថកិច្ច ក៏ព្រោះតែពួកគេមានមេខ្យល់ក្នុងការចែករំលែកផលប្រយោជន៍ឲ្យជំនាញ និងសមត្ថកិច្ចចម្រុះនានានៅក្នុងខេត្តនេះ ។ មេខ្យល់ឈ្មោះ ហួន ធី ដែលមានទីលំនៅតំបន់កំពង់លួង ស្រុកក្រគរ ជាអ្នកដែលចេញមុខបង្ក្រាបបទល្មើស និងកសាងបទល្មើស ។ អ្នកដែលចង់ប្រព្រឹត្តល្មើសត្រូវទាក់ទងលោកហួន ធី ហើយអ្នកដែលមិនទាក់ទង
មុខជាត្រូវប្រឈមការចាប់បង្ក្រាបដាក់គុកច្រវាក់គ្មានថ្ងៃចេញឡើយ ។
បទល្មើសអួនហ៊ុំដែលកំពុងធ្វើសកម្មភាពជាចំហរទាំងយប់ទាំងថ្ងៃនេះ ត្រូវគេអះអាងថា មានការឃុបឃិតជាប្រព័ន្ធ ចាប់ពីមន្ត្រីជំនាញ ជលផល រហូតដល់កម្លាំងប្រដាប់អាវុធផ្សេងទៀត ។ មិនតែប៉ុណ្ណោះ ប្រភពខ្សឹបខ្សៀវថា អាជ្ញាធរខេត្តនេះក៏បានផ្តេកផ្តួលក្នុងផលប្រយោជន៍ជាមួយពួកអ្នកប្រព្រឹត្តល្មើសទាំងនោះដែរ ។ រីឯជនណាដែលគេចាត់ទុកថា ជាឆ្អឹងទទឹងក មុខជាត្រូវចាប់បង្ក្រាបជាមិនខានឡើយ បើទោះបីជាគ្មានភស្តុតាងដាក់បន្ទុកឲ្យរឹងមាំក៏ដោយ ។ ប្រភពបានឲ្យដឹងបន្ថែមថា ពួកឈ្មួញកំពុងធ្វើសកម្មភាពនេសាទល្មើសច្បាប់នៅក្នុងភូមិសាស្ត្របឹងទន្លេសាបនៃខេត្តពោធិ៍សាត់ ជាចំហរទាំងយប់ទាំងថ្ងៃនេះ ដោយសារមានរចនាសម្ព័ន្ធត្រឹមត្រូវ ៕
