សារព័ត៌មាន នគរវត្ត តែងតែនាំមុខគេជានិច្ច
ព្រោះតែអំពើពុករលួយហើយមិនចេះចែករំលែកឲ្យគេបានស៊ីផងនោះ ប្រធានពេទ្យសត្វខេត្តសៀមរាប លោក ព្រុំ វិច ត្រូវបានមន្ត្រីក្រោមឱវាទហែកកកាយរឿងពុករលួយជាបន្តបន្ទាប់ ។ បើទោះជាយ៉ាងណាក៏ដោយ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ខំយកចង្អេរទៅបាំងអំពើពុករលួយរបស់បុគ្គលព្រុំ វិច នោះដោយនឹកស្មានថា គ្មាននរណាមើលឃើញ ។ ប៉ុន្តែដឹងហើយ ចង្អេរមិនអាចបាំងអំពើពុករលួយធំប៉ុនដំរីរបស់បុគ្គលព្រុំ វិច នោះបានឡើយ ។
ប្រភពបានឲ្យដឹងថា អំពើពុករលួយយូរឆ្នាំរបស់លោកព្រុំ វិច គឺគ្រាន់តែករណីនាំសត្វចូលដោយគ្មានការត្រួតពិនិត្យសុខភាពសត្វគឺជារឿងមួយ ប៉ុន្តែការគាបសង្កត់ទៅលើក្រុមអាជីវករដែលប្រកបរបរកាប់ជ្រូកយកសាច់លក់នៅតាមទីផ្សារក្នុងក្រុងសៀមរាប និងតាមបណ្តាស្រុកនានាផ្សេងទៀត គឺជារឿងដែលកំពុងធ្វើឲ្យអាជីវករក្តៅក្រហាយ ។គេរាយការណ៍ថា សម្រាប់ជ្រូកមួយក្បាល ត្រូវលោក ព្រុំ វិច បញ្ជាឲ្យកូនចៅទៅយកសាច់មួយគីឡូក្រាម ដើម្បីយកទៅពិនិត្យរកមើលផ្សេងៗ ប៉ុន្តែការពិនិត្យនោះ រាល់ថ្ងៃមិនដែលឃើញមានលទ្ធផលទេ ។ នៅក្នុងមួយថ្ងៃ យ៉ាងហោចណាស់មានជ្រូក៣០០ក្បាល ត្រូវបានកាប់យកសាច់លក់ ។ មានន័យថា លោកព្រុំ វិច អាចប្រមូលសាច់ជ្រូកបាន៣០០គីឡូក្រាមយកទៅលក់ ។ នេះជាអំពើពុករលួយស្របច្បាប់ ។
ប្រភពបានបន្ថែមថា ក្នុងមួយថ្ងៃៗ លោកព្រុំ វិច ព្រមទាំងបក្ខពួកប្រមូលលុយបានរាប់លានរៀលយកទៅចែកគ្នាធ្វើមានបាន ។ រីឯប្រធានមន្ទីរកសិកម្ម លោក ទា គឹមសុទ្ធ បើទោះបីជាធ្លាប់ឮកូនចៅរអ៊ូរទាំបែបណាក៏ដោយ ក៏មិនដែលមានវិធានការទៅលើលោកព្រុំ វិច នោះដែរ ជាងនេះទៅទៀត បើទោះបីលោកព្រុំ វិច ដាក់ការគាបសង្កត់ទៅលើអាជីវករអ្នកកាប់ជ្រូកយ៉ាងណាក៏ដោយ ក៏លោកនៅតែធ្វើមិនដឹងដែរ ។ យ៉ាងដូច្នេះ ទាំងអាជីវកររកស៊ីកាប់ជ្រូកនៅខេត្តសៀមរាប ក៏ដូចជាអ្នកនាំសត្វមកលក់នៅខេត្តសៀមរាប និងមន្ត្រីរាជការ ក្រោមឱវាទលោកព្រុំ វិច ទទូចឲ្យថ្នាក់ដឹកនាំក្រសួងកសិកម្មចាត់វិធានការ មើលលោកព្រុំ វិច ប្រធានការិយាល័យពេទ្យសត្វនៃមន្ទីរកសិកម្មខេត្តសៀមរាបផង ៕
