សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មនុស្សប្រុស ស្រីចំនួន៣១២នាក់ ក្នុងនោះមានជនជាតិចិន១៤នាក់ រួមទាំងគ្រឿងញៀនជិត៥០គីឡូក្រាម ដែលនាំគ្នាចូលទៅកម្សាន្ត ក្នុងមជ្ឈមណ្ឌលរ៉ុក ត្រូវបានលោក ឧត្តមសេនីយ៍ឯក ស ថេត អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ ដឹកនាំបញ្ជាដោយផ្ទាល់បើកប្រតិបត្តិការបង្ក្រាបគ្រឿងញៀនទ្រង់ទ្រាយធំ ដោយមានការសម្របសម្រួលពីតំណាងអយ្យការ បានឆ្មក់ចូលឆែកឆេរទីតាំងជាក់ស្តែង ក្នុងករណីជួញដូរនិងប្រើប្រាស់គ្រឿងញៀន ។
ករណីបង្ក្រាបក្រុមជួញដូរ និងប្រើប្រាស់គ្រឿងញៀនខាងលើនេះ បានធ្វើឡើងកាលពីវេលាម៉ោង១ រំលងអធ្រាត្រ ឈានចូលថ្ងៃសៅរ៍ ៤រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៣ ខែកុម្ភៈ ឆ្នាំ២០១៩ ស្ថិតក្នុងមជ្ឈមណ្ឌលក្លឹបកម្សាន្តរ៉ុក ដែលមានទីតាំងនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ប្រតិបត្តិការដ៏ក្តៅគគុកទ្រង់ទ្រាយធំ និងពុំធ្លាប់ មានពីមុនមកនេះ គឺលោក ឧត្តមសេនីយ៍ឯក ស ថេត អគ្គស្នងការង និងជាស្នងការនគរបាលរាជធានីភ្នំពេញ បានដឹកនាំកម្លាំងនគរបាលព្រហ្មទណ្ឌកំរិតស្រាលនឹងកម្រិតធ្ងន់ សហការជាមួយនគរបាលខណ្ឌចំការមន នឹងកម្លាំងអន្តរាគមន៍ពិសេសរបស់ស្នងការដ្ឋាននគរបាល រាជធានីភ្នំពេញឃាត់ខ្លួនជនសង្ស័យជួញដូរនឹងប្រើប្រាស់សារធាតុញៀនចំនួន៣១២នាក់ ក្នុងនោះមានជនជាតិចិន១៤នាក់ រួមទាំងគ្រឿងញៀនជិត៥០គីឡូក្រាម ។ ដោយសារធាតុញៀនប្រភេទម្សៅ៣៩គីឡូក្រាម ; សារធាតុញៀនប្រភេទទឹក ៩គីឡូ២ខាំ ;ជញ្ជីងសម្រាបថ្លឹងគ្រឿងញៀនចំនួន១២គ្រឿង និងកាំភ្លើងខ្លីចំនួន១ដើម រួមជាមួយសំភារៈជាច្រើនទៀត ។
ជនសង្ស័យមនុស្សប្រុសស្រីចំនួន៣១២នាក់ រួមទាំងគ្រឿងញៀនជិត៥០គីឡូក្រាម ត្រូវបាននាំខ្លួនធ្វើកំណត់ហេតុសាកសួរតាមនីតិវិធីនៅស្នងការដ្ឋាននគរបាលរាជធានីភ្នំពេញ ដើម្បីកសាងបញ្ជូនសំណុំទៅសាលាដំបូងរាជធានីភ្នំពេញ ចាត់ការតាមច្បាប់ ៕ ភារ៉ា ដង្កោ+ស រស្មី
