សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នៅវេលាម៉ោង៩ព្រឹក ថ្ងៃទី២៥ ខែកុម្ភៈ ឆ្នាំ២០១៩ នាវាកងកម្លាំងស្វ័យ ការពារជប៉ុន ចំនួន២គ្រឿង បានចូលចតនៅកំពង់ផែស្វយ័ត ក្រុងព្រះសីហនុ រយៈពេល៤ថ្ងៃ (ថ្ងៃទី25 ដល់ 28) ក្នុងដំណើរទស្សនកិច្ចជាផ្លូវការនៅព្រះរាជាណាចក្រកម្ពុជា ដើម្បីរិតចំណងសាមគ្គីភាព មិត្តភាព រវាងប្រទេសទាំងពីរ និងហ្វឹកហ្វឺនដល់នាវិកបើកបរនាវាចម្ងាយឆ្ងាយផងដែរ ។
មន្ត្រីកងទព័ជើងទឹកកម្ពុជា ដែលទៅទទួលបដិសណ្ឋារកិច្ចប្រតិភូពេលចូលចត ដល់កំពង់ផែថ្លែងថា តាមគម្រោង ក្រោយការចូលចត ប្រតិភូមេបញ្ជាការនាវា នឹងអញ្ជើញទៅទស្សនាព្រះបរមរាជវាំង សារមន្ទីរជាតិ វត្តអារាម សាលារៀន អង្គភាពមួយចំនួន ដាក់កម្រងផ្កា នៅវិមានឯករាជ្យ និងចូលជួបសំដែងការគួរសមជាមួយគណៈអភិបាលខេត្តព្រះសីហនុ និងមន្ត្រីយោធាជាន់ខ្ពស់ នៃកងយោធពលខេមរភូមិន្ទផងដែរ។
នាវាទាំងពីរគ្រឿងរួមមាន ទី1.នាវាឈ្មោះ SETOYUKI (TV-3518) បណ្តោយ 130ម៉ែត្រ, ទទឹង 13,60ម៉ែត្រ , ជម្រៅទឹក 8,50ម៉ែត្រ, ទំងន់ផ្ទុក 3050តោន, នាវិក ប្រមាណ 167នាក់, មេបញ្ជាការនាវា លោកវរនាវីទោ NAOTO NAKADERA ។
ទី2.នាវាឈ្មោះ SHIMAYUKI (TV-3513) បណ្តោយ 130ម៉ែត្រ, ទទឹង 13,60ម៉ែត្រ, ជម្រៅទឹក 8,50ម៉ែត្រ, ទំងន់ផ្ទុក 3050តោន, នាវិក ប្រមាណ 167នាក់, មេបញ្ជាការនាវា លោកវរនាវីទោ TAKEHIKO SAITO នាវិកសរុបទាំងអស់ចំនួន 334នាក់។
ប្រធានប្រតិភូ លោកវរនាវីឯក YOSHIYUKI NAKAGANA មេបញ្ជាការហ្វឹកហ្វឺនអង្គភាពលេខ1 នៃកងកម្លាំងស្វ័យការពារជប៉ុន ៕ ឆ្លាម សមុទ្រ
