សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ បុរសម្នាក់តខ្សែភ្លើងអគ្គិសនីយកទៅឆក់ត្រី ខុសបច្ចេកទេស បណ្ដាលឲ្យឆក់ស្លាប់នៅនឹងកន្លែង មាត់ត្រពាំងចម្ងាយ៧០ម៉ែត្រ ខាងក្រោយផ្ទះ ព្រោះតែយកខ្សែភ្លើងមានមុខតំណរច្រើន មកតឆក់ត្រី ។
ប្រភពពីមន្ត្រីនគរបាលរដ្ឋបាលបសេដ្ឋ បានឲ្យដឹងថា មានករណីឆក់ខ្សែភ្លើងបណ្ដាលឲ្យស្លាប់មនុស្សម្នាក់ នៅនឹងកន្លែងកើតហេតុ ជាប់មាត់ត្រពាំងទឹកក្រោយផ្ទះចម្ងាយ ៧០ម៉ែត្រ កាលពីរសៀលថៃ្ងចន្ទ ទី២៥ ខែកុម្ភៈ ឆ្នាំ២០១៩ ជនរងគ្រោះមានឈ្មោះ ឃិន ចឹក ភេទប្រុស អាយុ៤២ឆ្នាំ រស់នៅក្នុងភូមិព្រៃឃ្លៃ ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។
ប្រភពបន្តថា ក្រោយកើតហេតុអាជ្ញាធរភូមិ ឃុំ មន្រ្ដីនគរបាលប៉ុស្តិ៍ ព្រមទាំងបងប្អូនប្រជាពលរដ្ឋបាននាំគ្នាជួយសង្រ្គោះបឋម តែអនិច្ចារជនរងគ្រោះបានស្លាប់ បាត់ហើយ មូលហេតុដោយសារតែយកខ្សែភ្លើងមានតំណរហើយតខុសបច្ចេក ទើបពេលចុះទឹកមិនទាន់បានឆក់ត្រីមួយផង ក៏ឆ្លងចរន្ដអគ្គិសនី ប៉ះទឹកឆក់ទាញដួលតែម្ដង ។
ក្នុងនាមសមត្ថកិច្ច ក៏សូមសំណូមពរដល់បងប្អូនប្រជាពលរដ្ឋទាំងអស់ សូមមេត្តាកុំជ្រើសរើសយកវិធីនេះ រកត្រី បើទោះបីការឆក់ត្រីនៅត្រពាំងទឹកផ្ទាល់ខ្លួនក៏ដោយ ពិសេសគឺបានរួមចំណែកបំផ្លិចបំផ្លាញនូវផលមច្ឆជាតិ ។
ម្យ៉ាងវិធីរកត្រីរបៀបនេះ គឺជាអំពើខុសច្បាប់ដែលត្រូវគួរជៀសវាងរួមសហការផ្ដល់ព័ត៌មានមកសមត្ថកិច្ចអាជ្ញាធរមូលដ្ឋាន ភូមិ ឃុំ និងប៉ុស្តិ៍នគរបាលរដ្ឋបាលដើម្បីរាយការណ៍ជូនជំនាញចុះអប់រំ និងចាត់ការតាមច្បាប់ ក្នុងករណីប្រព្រឹត្ដបទល្មើសជាក់ស្ដែង ” ត្រូវបង្កើនការអប់រំណែនាំ និងផ្សព្វផ្សាយឲ្យទូលំទូលាយជ្រួតជ្រាបទៅដល់ស្រទាប់មហាជនអំពីការគ្រោះថ្នាក់បណ្ដាលមកពី អំពើឆក់ត្រីដោយប្រើចរន្ដភ្លើងអគ្គិសនី D.C ភ្លើងអាគុយ A.C ជាដើម៕ សេនាស័ក្តិ
