សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តក្រុងដឹកអ្នកដំណើរបោះពួយយ៉ាងលឿន ជ្រុលបុករថយន្តស៊េរីទំនើបមួយគ្រឿង ដែលបត់ឆ្វេងឆ្លងផ្លូវ បណ្ដាលឲ្យរេចង្កូតទៅបុកបង្គោលភ្លើងនៅតាមចិញ្ចើមផ្លូវ ។ហេតុការណ៍នេះបានកើតឡើងនៅម៉ោងជាង៧យប់ថ្ងៃទី២៦ ខែកុម្ភ: ឆ្នាំ២០១៩ នៅតាមបណ្ដោយផ្លូវហាណូយកែងនិងផ្លូវ១៩៦៦ ខាងជើងសាលាខណ្ឌសែនសុខ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុគេឃើញ បុរសវ័យចំណាស់ម្នាក់ បើកបររថយន្តស៊េរីទំនើបមួយគ្រឿងម៉ាក តូយ៉ូតាហ្វ័រធូន័រ ពណ៌ស ពាក់ស្លាកលេខ ភ្នំពេញ2AL-0989 ធ្វើដំណើរតាមបណ្តោយផ្លូវហាណូយ ក្នុងទិសដៅពីជើងទៅត្បូង។ ខណៈមកដល់ចំណុចកើតហេតុ រថយន្តកបានបត់ឆ្វេងឆ្លងទៅផ្លូវ ស្រាប់តែមានរថយន្តក្រុងដឹកអ្នកដំណើររបស់ក្រុមហ៊ុន KSO ដឹកអ្នកដំណើរ ពាក់ស្លាកលេខ ភ្នំពេញ3C-1886 បើកតាមបណ្ដោយផ្លូវហាណូយ ក្នុងទិសដៅបញ្រ្ចាសទិសគ្នា ក្នុងល្បឿនយ៉ាងលឿន បានជ្រុលទៅបុករថយន្តតូយ៉ូតាហ្វ័រធូន័រ ពីក្រោយពេញទំហឹង បណ្តាលឲ្យរថយន្តហ្វ័រធូន័រ ជ្រុលទៅបុកបង្គោលភ្លើងមួយដើម នៅលើចិញ្ចើមផ្លូវ បណ្ដាលឲ្យរងការខូចខាតផ្នែកខាងមុខ ។
បន្ទាប់ពីកើតហេតុ សមត្ថកិច្ចមូល និងសមត្ថកិច្ចជំនាញចរាចរ បានចុះមកដល់កន្លែងកើតហេតុ បានឲ្យភាគីទាំងសងខាង ទើបសម្របសម្រួលដោះស្រាយគ្នា ប៉ុន្តែដោះស្រាយគ្នាមិនត្រូវ សមត្ថកិច្ចជំនាញវាស់វែង យករថយន្តទាំងពីរគ្រឿង ទៅរក្សាទុកនៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ ៕ ជ្រោយពេជ្រ
