សារព័ត៌មាន នគរវត្ត តែងតែនាំមុខគេជានិច្ច
ខេត្រកណ្ដាល៖ បុរសម្នាក់បើកម៉ូតូបាន រេចង្កូតបុកសួនច្បារពុះចែកទ្រូងផ្លូវដោយខ្លួនឯង បណ្ដាលឲ្យបោកទៅនឹងផ្លូវស្លាប់ភ្លាមៗនៅកន្លែងកើតហេតុ ។
ហេតុការណ៍គ្រោះថ្នាក់ ចរាចរណ៍ខាងលើនេះ បានកើតឡើងនៅវេលាម៉ោង៣និង៣០នាទីយប់ រំលងអធ្រាត្រ ឈានចូលថ្ងៃទី២៧ ខែកុម្ភៈ ឆ្នាំ២០១៩ លើផ្លូវជាតិលេខ៦ ចន្លោះគីឡូមែត្រលេខ ២៧-២៨ ស្ថិតក្នុងភូមិជ្រោយមេត្រីលើ ឃុំឫស្សីជ្រោយ ស្រុកមុខកំពូល ខេត្តកណ្ដាល ។
មន្រ្ដីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះស្លាប់ឈ្មោះ ឡោ អ៊ុយ ភេទប្រុស អាយុ២២ឆ្នាំ មានទីលំនៅ ភូមិស្វាយទៀប ឃុំស្វាយទៀប ស្រុកចំការលើ ខេត្តកំពង់ចាម បើកបរម៉ូតូម៉ាក MSX ពណ៌ខ្មៅ ពាក់ស្លាកលេខភ្នំពេញ 1GP-5856 ។
ប្រភពដដែលបន្ដថា នៅមុនពេលកើតហេតុ សាក្សីបានឃើញជន រងគ្រោះខាងលើ បើកបរម៉ូតូតាម បណ្ដោយផ្លូវជាតិលេខ៦ ក្នុងទិសដៅពីត្បូងទៅ ជើង លុះបើកមកដល់ ចំណុចកើតហេតុ ជនរងគ្រោះជាអ្នកបើក បរម៉ូតូខាងលើ បានរេចង្កូតមកពៀរបុកសួនច្បារពុះចែកទ្រូងផ្លូវ បណ្ដាលឲ្យស្លាប់ភ្លាមៗនៅកន្លែងកើតហេតុ ។
ក្រោយពីមានហេតុការណ៍កើតឡើង នគរបាលជំនាញបានចុះមកធ្វើការពិនិត្យ វាស់វែង និងកសាងឯកសារដកហូតយកម៉ូតូជនរងគ្រោះយកទៅរក្សាទុកនៅអធិការដ្ឋាននគរបាល ។ ចំណែកសាកសពជនរងគ្រោះ ត្រូវបាននគរបាលជំនាញប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕ ស្អាងជ័យ
