សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ ពលរដ្ឋចំនួន៦ភូមិ នៃសង្កាត់អូរសា្មច់ កំពុងតែមានការប្រឈមនឹងការខ្វះខាតទឹកប្រើប្រាស់ប្រចាំថ្ងៃ ហើយពួកគាត់បានទៅសុំការអន្តរាគមន៍បញ្ហាកង្វះទឹកប្រើប្រាស់នេះ ពីអាជ្ញាធរសង្កាត់អូរសា្មច់ផងដែរ តែពុំទាន់មានដំណោះស្រាយជួយដល់ពួកគាត់នៅឡើយ។
សូមបញ្ជាក់ថា ចាប់ពីចំណុចផ្សារថ្មមក គឺពលរដ្ឋពុំមានទឹកប្រើប្រាស់គ្រប់គ្រាន់ឡើយ។ នេះបើតាមការបញ្ជាក់ពីពលរដ្ឋដែលរស់នៅតំបន់អូរសា្មច់នោះ។
លោក អ៊ុន សុភ័ក្រ អភិបាល នៃគណៈអភិបាលក្រុងសំរោងបានអះអាងថា តំបន់អូរសា្មច់ មិនទាន់មានការប្រឈមខ្លាំងទៅនឹងការខ្វះខាតទឹកប្រើប្រាស់នោះទេ ដោយសារតែខាងអ្នកផ្គត់ផ្គង់ទឹកសា្អតនៅតំបន់អូរសា្មច់ បានធ្វើការបើកក្នុង១ថ្ងៃ មាន២ពេល ស្មើនឹង៦ម៉ោង ដើម្បីរក្សាប្រភពទឹកទៅថ្ងៃខាងមុខ កុំឲ្យមានការខ្វះខាតទឹក។
ដូច្នេះ សូមឲ្យពលរដ្ឋនៅសង្កាត់អូរសា្មច់ទាំងអស់ ត្រូវប្រើប្រាស់ទឹកដោយមានការសន្សំសំចៃផងដែរ។
សូមបញ្ជាក់ថា ចាប់ពីរសៀលថ្ងៃទី៦ ខែមីនា ឆ្នាំ២០១៩នេះ តទៅ ខាងក្រុមហ៊ុនផ្គត់ផ្គង់ទឹកអូរសា្មច់ នឹងបើកឲ្យប្រើប្រាស់មានរយៈពេល៦ម៉ោង នៅពេលយប់វិញ នេះបើតាមការឲ្យដឹងពី លោក អ៊ុន សុភ័ក្រ អភិបាលក្រុងសំរោងផងដែរ ៕ ប៉ែន នួន
