សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីមានស្រ្តីវ័យ៦៤ឆ្នាំម្នាក់ បានដាច់ខ្យល់ស្លាប់នៅលើគ្រែ ក្នុងផ្សារក្រមួន ខណៈដែលគាត់មានអាការ:មិនស្រួលខ្លួន ហើយជំងឺបេះដូងរើឡើង បានដើរសំដៅទៅមន្ទីរពេទ្យនៅក្បែរនោះដើម្បីជួយសង្គ្រោះ តែមិនទាន់ដល់ពេទ្យផងក៏ស្លាប់បាត់ ។
ករណីនេះ បានកើឡើងកាលពីវេលាម៉ោង៤ ទៀបភ្លឺឈានចូលថ្ងៃទី១១ ខែមីនា ឆ្នាំ២០១៩ នៅលើគ្រែចិញ្ចើមផ្លូវផ្សារក្រមួន រំលងផ្លូវម្ខាងនៃផ្ទះពេទ្យ ក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
ស្ត្រីខាងលើឈ្មោះ យ៉ែម ឡាប អាយុ៦៤ឆ្នាំ មុខរបរកោសខ្យល់ និងចាប់សសៃ មានទីលំនៅភូមិឃ្លាំងមឿងជើង ឃុំព្រែកអំពិល ស្រុកខ្សាច់កណ្តាល ខេត្តកណ្ដាលមានកូនស្រីម្នាក់ ឈ្មោះ វី សំណាង អាយុ៤១ឆ្នាំ ជាកសិកររស់នៅជាមួយគ្នា។
ប្រភពព័ត៌មានពីស្ត្រីវ័យ៦១ឆ្នាំឈ្មោះ សេង ហ៊ន ដែលជួនជនរងគ្រោះមកពេទ្យ ឲ្យដឹងថា នៅមុនពេលកើតហេតុ ជនរងគ្រោះមានអាការ:មិនស្រួលខ្លួន ហើយគាត់ស្រែកថា ស្ទះហើយស្ទះហើយ រួចជនរងគ្រោះ ក៏កោសខ្យល់ដោយខ្លួនឯង នៅតែមិនស្រួលទៀត ទើបជនរងគ្រោះបបួលអុំស្រី ឲ្យជូនមកពេទ្យ ខណ:នាំគ្នាដើរមកជិតដល់ពេទ្យហើយ មើលទៅមិនទាន់ឃើញបើកទ្វារផង ជនរងគ្រោះក៏ប្រាស់ដេកនៅលើគ្រែ ក្នុងផ្សារក្រមួនដោយស្រែកថា អួយៗប្រមាណ១០នាទី ក៏បាត់មាត់ស្ងាត់ឈឹង ខណ:អុំស្រីដែលរួមដំណើរជាមួយកំពុងទៅហៅពេទ្យ ទើបដឹងថា ជនរងគ្រោះមេស្លាប់បាត់ហើយ។
តាមការឲ្យដឹងពីកូនស្រីជនរងគ្រោះ បានប្រាប់សមត្ថកិច្ចថា ម្តាយរបស់គាត់ មានឈឺជំងឺបេះដូងអស់រយ:ពេល៤ឆ្នាំហើយ។ តាមការពិនិត្យ និងសន្និដ្ឋានរបស់សមត្ថកិច្ចជំនាញ បានបញ្ជាក់ថា ជនរងគ្រោះស្លាប់ ដោយសារជំងឺគាំងបេះដូង រួចបានប្រគល់សពឲ្យកូនស្រី យកទៅធ្វើបុណ្យតាមប្រពៃណីនៅស្រុកកំណើត៕អារុណរះ
