សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសម្នាក់ បានរងនូវផ្លែកាំបិតផ្គាក់ចំនួន៣កន្លែង ដោយសារកណ្ដាប់ដៃភាគីជនសង្ស័យ ដៃដល់ បណ្ដាលឲ្យស្លាប់ក្នុងថ្លុកឈាមយ៉ាងរន្ធត់ ដែលករណីនេះ អាចបណ្ដាលមកពីភ្លើងប្រច័ណ្ឌប្រពន្ធ ។
ហេតុការណ៍នេះកើតឡើងនៅវេលាម៉ោង១០ និង៤៩នាទីយប់ ថ្ងៃច័ន្ទ ៦កើត ខែផល្លុន ឆ្នាំច សំរឹទ្ធស័កិ ព.ស ២៥៦២ ត្រូវនឹងថ្ងៃទី១១ ខែមីនា ឆ្នាំ២០១៩ នៅម្ដុំវាលស្បូវ (ផ្ទះជនសង្ស័យដៃដល់) ស្ថិតក្នុងភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិ៍សាត់ ។
លោកវរសេនីយ៍ឯក ធាង ឡេង អធិការនៃអធិការដ្ឋាននគរបាលស្រុកវាលវែង បានឲ្យដឹងថា ជនរងគ្រោះ (ស្លាប់) ឈ្មោះ ចាន់ ពិនិត្យ ភេទប្រុស អាយុ ២៣ឆ្នាំ ជនជាតិខ្មែរ មុខរបរជាងឈើ មានទីលំនៅភូមិស្បូវរីក ឃុំលាច ស្រុកភ្នំក្រវាញ ខេត្តពោធិ៍សាត់ បច្ចុប្បន្ន ស្នាក់នៅភូមិ ឃុំកើតហេតុ បានរងរបួសត្រង់កចំនួន ៣កន្លែង (ស្លាប់) ភ្លាមៗ ចំណែកជនសង្ស័យដៃដល់ជាម្ចាស់ផ្ទះឈ្មោះ អឹុម វុទ្ធី ភេទប្រុស អាយុ៣៣ឆ្នាំ ជនជាតិខ្មែរ មានប្រពន្ធ និងកូនម្នាក់ ក្នុងបន្ទុកគ្រួសារ មានទីលំនៅភូមិកាប់គោថ្មី សង្កាត់អូរចារ ក្រុងបាត់ដំបង ខេត្តបាត់ដំបង បច្ចុប្បន្ន រស់នៅភូមិ ឃុំកើតហេតុ ។
លោកអធិការនគរបាលបន្តថា ជនរងគ្រោះ និងជនសង្ស័យរាប់អានគ្នា ហើយមុនកើតហេតុជនរងគ្រោះ និងបងថ្លៃម្នាក់ទៀត បានទិញស្រាបៀរមកផឹកសុីជុំគ្នានៅលើផ្ទះ កើតហេតុ រហូតស្រវឹងរៀងៗខ្លួន ក៏ដេកទាំងអស់គ្នានៅលើផ្ទះ លុះនៅម៉ោងខាងលើ ជនសង្ស័យបានហៅប្រពន្ធចុះមកក្រោមជូន ទៅបត់ជើង ដោយដៃកាន់កាំបិត ប្រពន្ធមានការសង្ស័យ ក៏សួរបងឯង គ្រាន់តែទៅបត់ជើង ចាំកាន់កាំបិតធ្វើអ្វី ទាស់សម្ដីគ្នាចុះឡើងៗ ធ្វើឲ្យជនរងគ្រោះភ្ញាក់ពីដំណេកសួរបណ្ដើរចុះពីលើផ្ទះបណ្ដើរ ប៉ុន្តែជនដៃដល់តបវិញថា ឯងកុំចេះរឿងប្តីប្រពន្ធអញ ខណៈនោះ ក៏មិនបង្អង់ដៃដែរ កាប់យក៍ៗតែម្ដង រួចរត់គេចបាត់ ។
លោកបន្តទៀតថា តាមការពិនិត្យ និងស្រាវជ្រាវ ដើម្បីស្រង់យកម្លើយ អាចសន្និដ្ឋានបានថា ជនសង្ស័យដៃដល់ប៉ុនប៉ងលើប្រពន្ធជាមុន ព្រោះតែភ្លើងប្រច័ណ្ឌប្រពន្ធ និងជនរងគ្រោះ ករណីនេះ អាជ្ញាធរមានសមត្ថកិច្ចស្ថាប័នជំនាញពាក់ព័ន្ធកំពុងមមាញឹកក្នុងស្វែងរកជនបង្ក ៕ ប៉ឹម ពិន
