ជិះម៉ូតូប៉ះដៃចង្កូតជាគោយន្តដឹកឈើដួលបោករបួសធ្ងន់ ២នាក់ប្ដីប្រពន្ធ

ខេត្តពោធិ៍សាត់៖ យ៉ាងហោចបុរសស្រ្តី ២នាក់ប្ដីប្រពន្ធបានរងរបួសធ្ងន់ ដោយសារគ្រោះថ្នាក់ចរាចរណ៍ជិះម៉ូតូប៉ះដៃចង្កូតជាគោយន្តដឹកឈើ នៅគ្រាដែលជនរងគ្រោះកំពុងធ្វើដំណើរច្រាស់ទិសគ្នា ។

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៦ និង៣៥នាទី ព្រលប់ ថ្ងៃអង្អារ ៧រោច ខែផល្លុន ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១២ ខែមីនា ឆ្នាំ២០១៩ នៅលើកំណាត់ផ្លូវថ្នល់កៅស៊ូ ត្រង់ចំណុចផ្លូវកោងខាងជើងលូផ្លូវបំបែក ស្ថិតក្នុងភូមិល្ហុង ឃុំរំលេច ស្រុកបាកាន ខេត្តពោធិ៍សាត់ ។

ប្រភពព័ត៌មានពីអាជ្ញាធរមានសមត្តកិច្ចមូលដ្ឋានបានឲ្យដឹងថា មិនកើតហេតុគេឃើញជនរងរបួស ២នាក់ប្ដីប្រពន្ធធ្វើដំណើររួមគ្នា ដោយម៉ូតូ ១គ្រឿងម៉ាក វ៉េវអាល់ហ្វា សេ១១០ សេរីឆ្នាំ២០១៤ ពណ៌ខ្មៅ ពាក់ស្លាកលេខ ពោធិ៍សាត់ 1E 5170 ក្នុងទិសដៅពីជើងឆ្ពោះទៅទិសខាងត្បូង លុះដល់ចំណុចកើតហេតុបានប៉ះដៃចង្កូតជាមួយគោយន្តកន្រ្តៃដឹកឈើ បណ្ដាលឲ្យភាគីខាងម៉ូតូដួលបោករងរបួសហូរឈាមស្រោចខ្លួន ចំណែកអ្នករួមដំណើរជាប្រពន្ធបាក់ជើងខាងឆ្វេង ។

ប្រភពដដែលខាងលើបន្តទៀតថា ២នាក់ប្ដីប្រពន្ធរងរបួសមានទីលំនៅភូមិអំពួច ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ភ្លាមៗនោះបានបញ្ជូនទៅសង្រ្គោះ នៅមន្ទីរពេទ្យបង្អែកស្រុកបាកាន ចំណែកម៉ូតូម្ចាស់សុំយកទៅជួសជុល ដោយឡែក៖ ភាគីខាងគោយន្ដកន្រ្តៃដឹកឈើបើកគេចបាត់៕ ប៉ឹម ពិន