សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ កាលពីរសៀលថ្ងៃទី១៥ ខែមីនា ឆ្នាំ២០១៩ មន្ត្រីដែនជម្រកសត្វព្រៃភ្នំណាមលៀ បានចុះធ្វើប្រតិបត្តិការល្បាតត្រង់ចំណុចអូរតាំកន ស្ថិតក្នុងភូមិសាស្ត្រឃុំពូលុះ ឃុំប៊ូស្រា ស្រុកពេជ្រាដា ដោយឃាត់បានរថយន្តដឹកឈើម៉ាកឡង់គ្រីសឺកែច្នៃ១គ្រឿង ដែលផ្ទុកឈើ១៨កំណាត់ ដែលក្នុងនោះមានឈឺគគីរ៤កំណាត់ និងឈើទេព្រូ ១៤កំណាត់ ។ ប្រតិបត្តិការនេះ នៅគ្រាដែល ពួកឈ្មួញខិលខូចរៀងចំដឹកឈើចេញឆ្លងដែនទៅប្រទេសវៀតណាម ។ បច្ចុប្បន្នវត្ថុតាងត្រូវបានរក្សាទុកនៅស្នាក់ការ វ៉ារយោង នៃដែនជម្រកសត្វព្រៃភ្នំណាមលៀ និងកសាងសំណុំរឿងនាំយកវត្ថុតាងទាំងនោះមករក្សាទុកនៅមន្ទីរបរិស្ថាន ។
ប្រតិបត្តិការនៃការបង្ក្រាបនេះត្រូវបានលោក វុធ សារុំ នាយកដែនជម្រកសត្វព្រៃភ្នំណាមលៀ បានឲ្យដឹងថា តំបន់អូរតាំកន នៅជិតព្រំដែនវៀតណាម ដែលសមត្ថកិច្ចលំបាកក្នុងការធ្វើប្រតិបត្តិការចុះទៅដល់ ។ ម្យ៉ាងទៀត ដោយសារកម្លាំងមន្ត្រីការពារបរិស្ថានមានចំនួនតិច ដូច្នេះ ការល្បាតគឺមិនអាចគោលដៅមួយចំនួនឲ្យបានទៀងទាត់នោះទេ ។ ពួកឈ្មួញ និងជនខិលខូច តែងតែឆ្លៀតឱកាសនៅពេលដែលសមត្ថកិច្ចឆកល្វែង មិនបានចុះទៅដល់គោលដៅទាំងនោះ ។ យ៉ាងណាក៏ដោយ មន្ត្រីបរិស្ថាននៃតំបន់ដែនជម្រកសត្វព្រៃភ្នំណាមលៀ នៅតែបន្តខិតខំប្រឹងប្រែងបំពេញភារកិច្ចរបស់ខ្លួន មិនបានធ្វេសប្រហែលសនោះទេ ។
គួរបញ្ជាក់ថា រថយន្តឡង់គ្រីសឺដឹកឈើខាងលើនេះ ត្រូវបាសមត្ថកិច្ចយោធាឃាត់ដើម្បីទារប្រាក់ ។ នៅពេលដែលម្ចាស់ឈើមិនអាចរកលុយគ្រប់ចំនួន និងទាន់ពេលវេលា ទើបបណ្តាលឲ្យក្រុមមន្ត្រីបរិស្ថានចុះល្បាតប្រទះឃើញ ក៏ឃាត់ទាំងរថយន្ត និងឈឺនោះតែម្តង ។
មន្ត្រីយោធាបានទារប្រាក់ពីម្ចាស់រថយន្តដឹកឈើនោះចំនួន៣ពាន់ដុល្លារ ។ ប៉ុន្តែម្ចាស់ឈើគ្មានលុយ និងកំពុងស្វះស្វែងរកលុយបន្ថែមទៀត ទើបធ្វើឲ្យរថយន្តដឹកឈើនោះមិនអាចធ្វើដំណើរឆ្លងដែនចូលទៅប្រទេសវៀតណាមបាន ។
លោក វុធ សារុំ បានឲ្យដឹងថា ពួកជនខិលខូចតែងតែប្រើគ្រប់សកម្មភាពដើម្បីកាប់ឈើ ឬលួចដឹកជញ្ជូនឈើ ។ យ៉ាងណាក៏ដោយ កម្លាំងបរិស្ថាននៅតំបន់ដែនជម្រកសត្វព្រៃភ្នំណាមលៀ មិនដែលបណ្តែតបណ្តោយ ឬបង្កលក្ខណៈឲ្យពួកគេធ្វើអ្វីស្រេចតែនឹងចិត្តនោះទេ ។ លោកបានបដិសេធន៍ចំពោះការផ្សព្វផ្សាយតាមបណ្តាញព័ត៌មានមួយចំនួន ជាពិសេសគេហទំព័រទូរទស្សន៍ព្រហ្មខ័ន ដែលផ្សព្វផ្សាយព័ត៌មានមូលបង្កាច់ ពាក់ព័ន្ធនឹងរឿងចាប់ឈើខាងលើនេះ ។ លោកបន្ថែមថា សមត្ថកិច្ចនៅដែនជម្រកសត្វព្រៃភ្នំណាមលៀនៅមានចំនួនកំណត់នៅឡើយ ។ នៅពេលដែលយើងចុះធ្វើប្រតិបត្តិការ តែងតែជួបប្រទះនូវបញ្ហាជាច្រើន ។ ប៉ុន្តែពួកយើងមិនដែលត្អួញត្អែរអំពីការលំបាកទាំងនោះទេ ។ ជាធម្មតាទេ ពួកឈ្មួញនៅទីងងឹត ពួកគេតែងតែលួចធ្វើសកម្មភាពគ្រប់បែបយ៉ាងនៅពេលដែលយើងធ្វេសប្រហែសបន្តិចបន្តួច ។
លោក កែវ សុភក្តិ ប្រធានមន្ទីរបរិស្ថានខេត្តមណ្ឌលគិរីអះអាងថា ទាំងថ្នាក់ដឹកនាំក្រសួង ក៏ដូចជាថ្នាក់ដឹកនាំខេត្ត សុទ្ធតែបានដឹងអំពីល្បិចកលរបស់ពួកជនខិលខូច ។ យ៉ាងណាក៏ដោយ សមត្ថកិច្ចបរិស្ថានមិនអាចគ្រប់គ្រងឲ្យល្អឥតខ្ចោះលើដែនសមត្ថកិច្ចរបស់ខ្លួនទេ ។ យ៉ាងណាក៏ដោយ យើងខិតខំប្រឹងប្រែងដើម្បីការពារព្រៃឈើនៅក្នុងដែនសមត្ថកិច្ចរបស់យើង ។ យើងមិនអាចបំពេញបំណងមនុស្សគ្រប់រូបបានទេ ប៉ុន្តែយើងនឹងខិតខំធ្វើការតាមតួនាទី និងភារកិច្ចរបស់យើង ៕ ហេង សូរិយា
