សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានស្លាប់ភ្លាមៗនៅ កន្លែងកើតហេតុ ចំណែកប្រពន្ធរងរបួស ខណៈបើករ៉ឺម៉កឆ្លងផ្លូវទៅលក់ បាយត្រូវរថយន្តបើកបុកពេញ ទំហឹងកាលពីវេលាម៉ោង៧និង២០នាទីយប់ ថ្ងៃទី១៨ ខែមីនា ឆ្នាំ២០១៩ នៅចំណុចខាងកើតផ្លូវរថភ្លើង តាមបណ្តោយផ្លូវជាតិលេខ៤ សង្កាត់កន្ទោក ខណ្ឌពោធិ៍សែនជ័យ ។
ជនរងគ្រោះ ទឹម សុភាន់ ភេទប្រុស អាយុ៣៦ឆ្នាំ មុខរបរលក់បាយ មានស្រុកកំណើតនៅភូមិព្រៃមូល ឃុំព្រែកពោធិ៍ ស្រុកទ្រាំង ខេត្តតាកែវ ។ ចំណែកប្រពន្ធរងរបួសធ្ងន់ ត្រូវបានបញ្ជូនទៅសង្គ្រោះភ្លាមៗ ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេបានឃើញ រ៉ឺម៉កលក់បាយបើកបរដោយ បុរសម្នាក់ និងរួមដំណើរជាមួយប្រពន្ធ ធ្វើដំណើរតាមដងផ្លូវជាតិលេខ៤ក្នុងទិសដៅពីកើតទៅលិចបំណងទៅលក់នៅមុខរោងចក្រហើយ បានឆ្លងផ្លូវស្រាប់តែមានរថយន្តហ៊ីយ៉ាន់ដាយ ពណ៌ស ពាក់ស្លាកលេខបាត់ដំបង 3A 2081 ដឹកចេកធ្វើដំណើរក្នុងទិស ដៅពីលិចទៅកើត ក្នុងល្បឿនលឿនជ្រុល បុកពេញទំហឹង បណ្តាលឲ្យប្តីស្លាប់ប្រពន្ធរងរបួស ។
ក្រោយពេលកើតហេតុរថយន្ត បង្កបានព្យាយាមបើករត់ ប្រហែល១០០ម៉ែត្រទើបឈប់ម្ចាស់ចុះរត់បាត់ត្រូវបានសមត្ថកិច្ចមូលទំនាក់ទំនងទៅជំនាញវាស់វែង យករថយន្ត និងរ៉ឺម៉កទៅរក្សាទុកនៅការិយាល័យចរាចរណ៍ជើងគោករាជធានី រង់ចាំដោះស្រាយតាមច្បាប់ ៕ សុខាសែនជ័យ
