ខ្សឹបដាក់ត្រចៀក៖ ផ្អើលសាលាស្រុកមេសាងលក់ដីគណបក្ស

ប្រជាពលរដ្ឋនៅទីរួមស្រុកមេសាង ខេត្តព្រៃវែងផ្អើលឈូឆរ ខ្សឹបតៗគ្នា ករណីដែលមន្ត្រីសាលាស្រុកមេសាងកំពុងឈូសឆាយដីអតីតសាលាស្រុក ឬអតីតសាលានយោបាយស្រុកមេសាង ដែលបច្ចុប្បន្នជាកម្មសិទ្ធិរបស់គណបក្សប្រជាជនស្រុក ទំនងជាលក់ឲ្យឈ្មួញទៅហើយ ។ ប្រភពពីមន្ត្រីនៅសាលាស្រុកមេសាងអះអាងថា សកម្មភាពឈូសឆាយដីអតីតសាលានយោបាយស្រុកមេសាងបាននិងកំពុងធ្វើយ៉ាងសកម្ម ដែលធ្វើឲ្យប្រជាពលរដ្ឋ មន្ត្រីរាជការមានចម្ងល់ ។ ចម្ងល់ក៏ព្រោះតែថា ការឈូសឆាយធ្វើឡើងហាក់ដូចជាលាក់លៀម ទំនងជាលក់ទៅឲ្យឈ្មួញរួចទៅហើយ ។

ប្រភពបានបន្ថែមថា អ្នកដែលដើរតួនាទីជាអ្នកសម្របសម្រួលលក់ដីគណបក្សប្រជាជនស្រុកមេសាងនោះ គឺលោក ហ៊ាង ផល្លី ប្រធានអង្គភាពលទ្ធកម្មសាលាស្រុកមេសាង ដោយការរួមចំណែកឃុបឃិតពីលោក កែវ ពិសិ ជាអភិបាលស្រុក ។ ដីនោះទីនេះធ្លាប់ឈូសឆាយបម្រុងនឹងលក់ម្តងរួចមកហើយ ប៉ុន្តែដោយមានប្រតិកម្មច្រើនពីប្រជាពលរដ្ឋ មន្ត្រីរាជការ ទើបផែនការនោះត្រូវបានផ្អាកមួយរយៈ ។ រហូតមកដល់ពេលនេះ សកម្មភាពឈូសឆាយបានកើតឡើងសារជាថ្មីទៀត ហេតុដូច្នេះហើយបានជាប្រជាពលរដ្ឋ ក៏ដូចជាមន្ត្រីរាជការជុំវិញសាលាស្រុកមេសាង យល់ថា ការឈូសឆាយដីជាលើកទីពីរនេះ គឺក្នុងបំណងលក់ដូចលើកមុននោះដែរ ។

ក្រុមអ្នករកស៊ីបញ្ហាដីធ្លី នៅតំបន់នោះនិយាយថា ដីចំណុចខាងលើ ដែលស្ថិតនៅកណ្តាលទីរួមស្រុកមេសាងមានតម្លៃគួរសមដែរ ។ នៅទីនោះ គេវាស់ដីតែក្បាល ដោយមិនគិតជម្រៅឬបណ្តោយនោះទេ ។ មួយម៉ែត្រក្បាលដីអាចតម្លៃរាប់ម៉ឺនដុល្លារដែរ ។ ដីនៅទីនោះមានក្បាលប្រហែល១០០ម៉ែត្រ ហើយបើលក់ក៏ប្រហាក់ប្រហែល១លានដុល្លារដែរ ។ ប្រជាពលរដ្ឋក៏ដូចជាមន្ត្រីរាជការជុំវិញសាលាស្រុកមេសាងស្នើឲ្យថ្នាក់ដឹកនាំខេត្ត ជាពិសេសគណបក្សប្រជាជនខេត្តព្រៃវែងពិនិត្យមើលករណីដីនៅស្រុកមេសាងនេះផង ពីព្រោះសមាជិកបក្សចេះតែភ័យខ្លាចបាត់ដីរួម ៕