សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ត្រីម្នាក់កើតកើតទុក្ខមិនសុខចិត្តទ្រាំលែងបាន នូវទង្វើរបស់ប្តីដែលរួមរស់នៅជាមួយជាមួយគ្នាអស់រយះពេល៨ឆ្នាំមកហើយ តែងតែប្រើហិង្សាស្ទើររាល់ថ្ងៃ ទើបសម្រេចចិត្តរត់មកប្តឹងសមត្ថកិច្ចទាំងមុខហើម ដើម្បីឲ្យជួយអន្តរាគមន៍ កាលពីវេលាម៉ោង៧យប់ថ្ងៃទី ២៥ ខែមីនា ឆ្នាំ ២០១៩ នៅប៉ុស្តិ៍នគរបាលរដ្ឋបាលចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះឈ្មោះ ឈុនលី មុន្នីរដ្ឋា អាយុ ៣០ឆ្នាំ មុខរបរលក់ស៊ុបគ្រឿងក្នុង ស្នាក់នៅ បន្ទប់ជួល ភូមិជម្ពូវ័ន ២សង្កាត់ចោមចៅទី ៣ខណ្ឌពោធិ៍សែនជ័យ រាជធានីភ្នំពេញ ។ ចំណែកបុរសជាប្តីឈ្មោះ កែវ បូរ៉ាស៊ី អាយុ ៣៦ឆ្នាំមុខរបរ បើករថយន្ត ស្នាក់នៅភូមិជម្ពូវ័ន ២សង្កាត់ ចោមចៅទី៣ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះបានឲ្យដឹងថា រូបគាត់ និងប្តីរបស់គាត់បានចាប់ដៃគ្នារួមរស់នៅជាមួយគ្នារយះពេល៨ឆ្នាំមកហើយ ថែមទាំងមានកូនចំនួន២នាក់ ជាចំណងដៃទៀតផង ។
ស្ត្រីរងគ្រោះបានបន្តថា ប្តីរបស់គាត់តែងតែរករឿងមិនឈប់មិនឈរ ស្ទើររាល់ថ្ងៃ និងប្រើអំពើហិង្សាជាច្រើនដង និងបំផ្លិចបំផ្លាញទ្រព្យសម្បត្តិរាប់មិនអស់ ទ្រាំលែងបានទើបសុំបែកផ្លូវគ្នាតែត្រូវបុរសជាប្តីតាមវាយបណ្តាលឲ្យរងរបួសបាក់ក្ដោងច្រមុះ រងរបួស ធ្ងន់ រត់មកប៉ុស្តិ៍នគរបាលរដ្ឋបាលចោមចៅទី៣ ដើម្បីសុំការអន្តរាគមន៍ និងដាក់ពាក្យបណ្ដឹងរក្សាទុកបើមានលើក្រោយទៀតរូបគាត់ និងសុំឲ្យសមត្ថកិច្ចចាត់ការតាមនីតិវិធី ៕ សុខាសែនជ័យ
