សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ភ្លាមៗ ខណៈដើរថ្មើជើងតាមផ្លូវលើកំណាត់ផ្លូវជាតិលេខ១សុខៗ ស្រាប់តែមានរថយន្តហាយឡេនឌ័រទំនងជាអ្នកបើកស្រវឹងស្រា រេចង្កូតមកបុកយ៉ាងពេញទំហឹងបណ្ដាលឲ្យជនរងគ្រោះខ្ទាតធ្លាក់ ស្រែបង្កការភ្ញាក់ផ្អើលដល់អ្នកភូមិ រាយការណ៍មកសមត្ថកិច្ច ចុះអន្តាគមន៍ ខណៈជនបង្ករត់គេចខ្លួនពាក់កណ្ដាលផ្លូវ ទើបឃាត់ខ្លួនបានអ្នកបើកបង្កហេតុ មកសាកសួរនៅអធិការដ្ឋាននគរបាលស្រុកស្វាយទាប ។
ហេតុការណ៍នេះ បានកើតឡើងកាលពីថ្ងៃអង្គារ ៦រោច ខែផល្គុន ឆ្នាំច សំរិទ្ធិស័ក ព.ស ២៥៦២ ត្រូវនឹងថ្ងៃទី២៦ ខែមីនា ឆ្នាំ២០១៩ វេលាម៉ោង៩និង៣០នាទីយប់ លើផ្លូវជាតិលេខ០១ ចន្លោះគីឡូម៉ែត្រ លេខ១៣៨ និង១៣៩ ត្រង់ចំណុចក្នុងភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង ។
បើតាមសមត្ថកិច្ចនគរបាលស្រុកបានឲ្យដឹងថា បុរសដែលស្លាប់មានឈ្មោះកែវ សារ៉ាត់ អាយុ៣៥ឆ្នំា មុខរបរ កសិករ រស់នៅភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង ។ ចំណែកអ្នកបើករថយន្តត្រូវបានស្គាល់ឈ្មោះ គុជ ភារម្យ ភេទប្រុស អាយុ៣៧ឆ្នាំ មុខរបរជាងអគ្គិសនី កាស៊ីណូ រស់នៅភូមិព្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង ខណៈបើករថយន្តម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២AP-៥៦០២ ។
ប្រភពបន្តថា មុនកើតហេតុមានបុរសម្នាក់បានដើរថ្មើរជើង ទិសដៅពីកើតទៅលិច លើកំណាត់ផ្លូវជាតិលេខ១ សុខៗស្រាប់តែមានរថយន្តហាយឡេនឌ័រ ម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២AP-៥៦០២ ទំនងជាអ្នកបើកស្រវឹងស្រារេចង្កូតមកបុកយ៉ាងពេញទំហឹង បណ្ដាលឲ្យជនរងគ្រោះខ្ទាតធ្លាក់ស្រែ បង្កការភ្ញាក់ផ្អើលដល់អ្នកភូមិរាយការណ៍ មកសមត្ថកិច្ចមកអន្តាគមន៍ ខណៈជនបង្ករត់គេចខ្លួនបានពាក់កណ្ដាលផ្លូវ ក៏ត្រូវបានឃាត់ខ្លួនអ្នកបើកបង្កហេតុមកសាកសួរនៅអធិការដ្ឋាននគរបាលស្រុកស្វាយទាប ។
រីឯសពត្រូវបានសមត្ថកិច្ចធ្វើកំណត់ហេតុ និងប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
