សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ប្រភពព័ត៌មានរបស់ស្នងការដ្ឋាននគរបាលខេត្តព្រះសីហនុ បានឲ្យដឹងថា នៅវេលាម៉ោង ២:៤០នាទីរំលងអធ្រាត្រ ឈានចូល ថ្ងៃទី២៧ ខែមីនា ឆ្នាំ២០១៩ មានគ្រោះថ្នាក់ចរាចរណ៍មួយកើតឡើង នៅផ្លូវជាតិលេខ៤ តំបន់ឃ្លាំងលើ ក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ បណ្តាលឲ្យបុរស២នាក់ ម្នាក់ស្លាប់ ម្នាក់ទៀតរងរបួសធ្ងន់។
ប្រភពដដែល បានបញ្ជាក់ថាៈ នៅវេលាម៉ោង ខាងលើ មានម៉ូតូ១គ្រឿង ម៉ាក EXCITER ពណ៌ខ្មៅ-ក្រហម គ្មានស្លាក លេខ អ្នកបើកបរឈ្មោះសុន ណារីម ភេទប្រុស អាយុ ២១ឆ្នាំ មុខរបរកម្មករ មានទីលំនៅ ភូមិ១ សង្កាត់លេខ១ ក្រុង/ខេត្តព្រះសីហនុ មានទិសដៅ ពីកើតទៅលិច លុះមកដល់ចំណុចខាងលើ បានបុកគ្នា ជាមួយម៉ូតូ១គ្រឿងទៀតម៉ាក HONDA C125 ពណ៌ខ្មៅ ស្លាកលេខ កែប1A-1566 អ្នកបើកបរមិនស្គាល់អត្តសញ្ញាណ ក្នុងពេលភ្លាមៗនោះ ស្រាប់តែមានរថយន្តធុនធំមួយគ្រឿងបើកស្របទិសគ្នា បុកកិនថែមទៀត រថយន្ដនោះម៉ាក Sterling ស្លាកលេខ ភ្នំពេញ3C-3319 អ្នកបើកបរមិនស្គាល់អត្តសញ្ញាណ គេចបាត់ពីកន្លែងកើតហេតុ ។
ក្នុងហេតុការណ៍គ្រោះថ្នាក់នេះ បណ្ដាលឲ្យស្លាប់ មនុស្សម្នាក់ និងរងរបួសធ្ងន់ម្នាក់។ សូមញ្ជាក់ថាអ្នកបើកបរម៉ូតូទាំងពីរ មានស្ថានភាពស្រវឹងស្រា និង មិនមានពាក់មួកសុវត្ថិភាពទេ ៕ ឆ្លាមសមុទ្រ
