សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បើករថយន្ត 4runner ទាំងស្ថានភាពស្រវឹងក្នុងល្បឿនលឿន ព្រមទាំងនៅក្នុងបុរីជាទីប្រជុំជន បណ្ដាលឲ្យរេចង្កូតទៅបុករ៉ឺម៉ក ម៉ូតូឥណ្ឌាពីក្រោយ ពេញទំហឹង ផ្លោងទៅបុករៈសម្ភារមុខផ្ទះល្វែងមួយចំនួនទៀតរងការខូចខាតយ៉ាងដំណំ តែមិនប៉ះពាល់ដល់មនុស្ស ។
ហេតុការណ៍គ្រោះថ្នាក់ចរាចរណ៍ខាងលើនេះ បានបង្កការភ្ញាក់ផ្អើលកាលពីវេលាម៉ោង៨ និង២០នាទីយប់ ថ្ងៃទី២៧ ខែមីនា ឆ្នាំ២០១៩ នៅក្បែរផ្សារបុរីចំការដូង ក្នុងបុរីចំការដូង សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើបានឲ្យដឹងថា នៅពេលកើតហេតុ គេឃើញរថយន្តបង្កម៉ាក 4runner ពណ៌ខ្មៅ ពាក់ស្លាកលេខ ភ្នំពេញ 2D-1231 បើកបរដោយបុរសម្នាក់មានសភាពស្រវឹងស្រាជាខ្លាំង បានធ្វើដំណើរតាមផ្លូវបេតុងក្នុងបុរី ទិសដៅពីកើតមកលិច ក្នុងល្បឿនលឿន ហើយស្រាប់តែចង្កូតជ្រុលទៅបុករ៉ឺម៉កម៉ូតូឥណ្ឌា ចំពីក្រោយពេញទំហឹង បណ្ដាលឲ្យរ៉ឺម៉កម៉ូតូឥណ្ឌាផ្លោងទៅបុកសម្ភារមុខផ្ទះ និងទ្វាផ្ទះ រងការខូចខាតយ៉ាងដំណំ ។ ចំណែកឯរថយន្តបង្កបានដាច់កាង និងបែកកង់មុខ ទៅមុខលែងរួច ។ តែមិនបង្កឲ្យមនុស្សរស់នៅក្នុងបុរីខាងលើរងរបួស និងស្លាប់ ។
ក្រោយកើតហេតុ ភាគីខាងរថយន្តបង្កបានបើកទ្វារចុះគេចខ្លួនបាត់ ដោយមិនដោះស្រាយជាមួយភាគីរងគ្រោះនោះទេ ទើបភាគីរងគ្រោះទាក់ទងទៅសមត្ថកិច្ចមូលដ្ឋាន និងជំនាញចរាចរណ៍ឲ្យមកត្រួត្យពិនិត្យ និងវាស់វែងយកទៅរក្សាទុកនៅអធិការដ្ឋាននគរបាលខណ្ឌដង្កោ រង់ចាំភាគីទាំង២ ចូលខ្លួនដោះស្រាយតាមនីតិវិធី ៕ ភារ៉ា ដង្កោ
