សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ គ្រោះថ្នាក់ចរាចរណ៍រវាងម៉ូតូបុកគោយន្តកន្ត្រៃ ក្នុងទិសដៅស្របគ្នា (ពីត្បូងទៅជើង) បណ្តាលឲ្យបុរសម្នាក់ស្លាប់ និងម្នាក់ទៀតរង របួសធ្ងន់ ខូចខាតម៉ូតូ១គ្រឿងយ៉ាងដំណំ ។
ហេតុការណ៍នេះបានកើតឡើងកាលពីវេលាម៉ោង១៩និង៣៥នាទី ថ្ងៃព្រហស្បតិ៍ ៨រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ ខែមីនា ឆ្នាំ២០១៩ លើផ្លូវកំណាត់ផ្លូវជាតិលេខ៦ ចន្លោះគីឡូម៉ែត្រលេខ១០៣-១០៤ ភូមិដំរីស្លាប់ ឃុំអណ្តូងពោធិ៍ ស្រុកបារាយណ៍ ខេត្តកំពង់ធំ ។
សមត្ថកិច្ចបានឲ្យដឹងថា ម៉ូតូម៉ាកហុងដា ZoomerX ពណ៌ក្រហម ស្លាកលេខ កំពង់ធំ 1J.3013 បើកបរដោយឈ្មោះ ម៉ូចនឿន ភេទប្រុស អាយុ១៩ឆ្នាំ នៅភូមិសិរីសាមគ្គីត្បូង ឃុំស្រឡៅ ស្រុកបារាយណ៍ ខេត្តកំពង់ធំ (ស្លាប់នៅកន្លែងកើតហេតុ) មិនពាក់មួកសុវត្ថិភាព មុខរបរកសិករ ។ អ្នករួមដំណើរឈ្មោះ ម៉ឹង តុលា ភេទប្រុស អាយុ៣០ឆ្នាំ នៅភូមិ ឃុំជាមួយអ្នកបើកបរម៉ូតូ របួសធ្ងន់ មិនពាក់មួកសុវត្ថិភាព មុខរបរកសិករ ។
ចំណែកគោយន្ដកន្ត្រៃ និងអ្នកបើកបរមិនស្គាល់អត្តសញ្ញាណ (បើកគោយន្តកន្ត្រៃគេចពីកន្លែងកើតហេតុបាត់) ។ មូលហេតុ បង្កឡើងអ្នកបើកបររម៉ូតូ បើកបរក្នុងស្ថានភាពស្រវឹង និងមានល្បឿនលឿន ។
ក្រោយកើតហេតុសមត្ថកិច្ចចុះវាស់វែង ធ្វើកំណត់ហេតុ និងបញ្ជូនជនរងគ្រោះទៅមន្ទីរពេទ្យ រួចប្រមូល វត្ថុតាងម៉ូតូរក្សាទុក នៅអធិការដ្ឋាននគរបាលស្រុកបារាយណ៍ និងប្រគល់សាកសព ជូនក្រុមគ្រួសារទៅយកទៅធ្វើបុណ្យតាមប្រពៃណី ៕ ប៊ុនរិទ្ធី
