បុរសម្នាក់ស្លាប់ និងបុរស២នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរ រវាងម៉ូតូ បុកម៉ូតូ

ខេត្តកំពង់ធំ៖ គ្រោះថ្នាក់ចរាចរ រវាងម៉ូតូ បុកម៉ូតូ ក្នុងទិសដៅផ្ទុយគ្នា បណ្តាលឲ្យបុរសម្នាក់ស្លាប់ និងបុរស២នាក់ទៀតរងរបួសធ្ងន់ ខូចខាតម៉ូតូ០២គ្រឿង ហេតុការណ៍នេះបានកើតឡើងកាលពីវេលាម៉ោង១៦ និង៤៥នាទី ថ្ងៃអង្គារ ០៥កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៩ ខែមេសា ឆ្នាំ២០១៩ លើកំណាត់ផ្លូវលេខ២៦៤A ក្នុងភូមិចាន់ ឃុំច្រនាង ស្រុកបារាយណ៍ ខេត្តកំពង់ធំ ។

សមត្ថកិច្ចបានឲ្យដឹងថា ម៉ូតូម៉ាកហុងដាវេវ ពណ៌ខ្មៅ ផ្លាកលេខគ្មាន(បើកបរទិសដៅពីលិចទៅកើត) អ្នកបើកបរមិនស្គាល់អត្តសញ្ញាណ(ស្លាប់នៅកន្លែងកើតហេតុ)(មិនពាក់មួកសុវត្ថិភាព) ។ និងម៉ូតូម៉ាកហុងដាឌ្រីមC125 ពណ៌ខ្មៅ ផ្លាកលេខកំពត1N.1086 (បើកបរទិសដៅពីកើតទៅលិច) ដោយឈ្មោះ តង ភេទប្រុស អាយុ២៧ឆ្នាំ នៅខេត្តកំពត (របួសធ្ងន់ផ្នែកក្បាល)(មិនពាក់មួកសុវត្ថិភាព) ។ អ្នករួមដំណើរឈ្មោះ តុក.ផាត ភេទប្រុស អាយុ៣២ឆ្នាំ នៅខេត្តកំពង់ចាម (របួសធ្ងន់ផ្នែកក្បាល)(មិនពាក់មួកសុវត្ថិភាព) ។

មូលហេតុជាបឋមបង្កដោយអ្នកបើកបរម៉ូតូទាំងពីរ បើកបរមិនប្រកាន់ស្តាំ និងមានល្បឿនលឿន ។

ក្រោយកើតហេតុសមត្ថកិច្ចបញ្ចូនជនរងគ្រោះទៅមន្ទីរពេទ្យ ចុះវាស់វែងធ្វើកំណត់ហេតុ និងប្រមូលវត្ថុតាងយកទៅរក្សាទុកនៅអធិការដ្ឋាននគរបាលស្រុកបារាយណ៍ រងចាំដោះស្រាយគ្នាតាមច្បាប់ ។

ចំណែកសាកសពយកទៅតម្កល់ទុកនៅវត្តប្រាំងសំរោង ដើម្បីស្រាវជ្រាវរកក្រុមគ្រួសារ ៕ ប៊ុនរិទ្ធី