សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ថៅកែខារ៉ាអូខេ លឺកាស៊ី បើករថយន្តស៊ីញ៉ូឆ្វេងបម្រុងឆ្លងបត់ត្រឡប់ក្រោយ ស្រាប់តែកង់បីឥណ្ឌា បើកលឿនមកពីក្រោយ ទៅបុកចំកង់រថយន្តខាងឆ្វេង ខ្ទាតក្រឡាប់ផ្ងារជើង បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ចុះជួយសម្របសម្រួលចរាចរណ៍ភ្លាមៗផងដែរ តែមិនមានរបួសនោះទេ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង០៨:០៥នាទីយប់ ថ្ងៃអាទិត្យ ទី១៥ ខែមេសា ឆ្នាំ២០១៩នេះ នៅតាមបណ្ដោយផ្លូវជាតិលេខ២ (មុខផ្ទះលក់សំបកកង់រថយន្តគ្រប់ប្រភេទយីហោ ចាន់ឃីម) ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញបុរសវ័យចំណាស់ម្នាក់ ដែលអ្នកភូមិនៅទីនោះស្គាល់ថា ជាថៅកែខារ៉ាអូខេ លឺកាស៊ី រួមជាមួយក្រុមគ្រួសារពីរបីនាក់ទៀតជាអ្នករួមដំណើរ បានបើករថយន្តមួយគ្រឿង ម៉ាក TOYOTA Hilux Revo ពណ៌ស ពាក់ស្លាកលេខភ្នំពេញ 2AQ-7799 ធ្វើដំណើរតាមបណ្ដោយផ្លូវជាតិលេខ២ ក្នុងទិសដៅពីត្បូងទៅជើង លុះមកដល់ចំណុចខាងលើ បានស៊ីញ៉ូឆ្វេងបម្រុងឆ្លងបត់ត្រឡប់ក្រោយ ស្រាប់តែកង់បីឥណ្ឌា មួយគ្រឿង ពណ៌ស (អត់ពាក់ស្លាកលេខ) ធ្វើដំណើរតាមបណ្ដោយផ្លូវជាតិលេខ២ ក្នុងទិសដៅស្របគ្នា ក្នុងល្បឿនលឿនមកពីក្រោយ ទៅបុកចំកង់រថយន្តខាងឆ្វេង ខ្ទាតក្រឡាប់ផ្ងារជើង បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចប៉ុស្តិ៍នគរបាលចាក់អង្រែក្រោម ចុះជួយសម្របសម្រួលចរាចរណ៍ភ្លាមៗផងដែរ តែក្នុងហេតុការណ៍គ្រោះថ្នាក់ចរាចរណ៍នេះ មិនមានអ្នករបួសនោះទេ។
ក្រោយមកសមត្ថកិច្ចបានបាញ់គំនូសរួចឲ្យរថយន្តអែបខាងសិន រួចឲ្យភាគីទាំងសងខាង ដោះស្រាយគ្នាមួយជំហានសិន ដោយភាគីខាងរថយន្ត មិនចង់វែងឆ្ងាយ ទើបយល់ព្រមសងសំណង១០០ដុល្លារ ដើម្បីបញ្ចប់រឿងតែម្ដង ៕ ភារ៉ា ដង្កោ
