សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ភ្លាមៗ ខណៈដើរចេញទៅខាងក្រៅផ្ទះ ពេលមេឃកំពុងមានភ្លៀង លាយខ្យល់ និងរន្ទះ ចៃដន្យបាញ់ចំលាន់កក្រើកដីមួយគ្រាប់ បង្កការភ្ញាក់ផ្អើលដល់ក្រុមគ្រួសារ និងអ្នកភូមិ ចេញមកមើល កាលពីវេលាម៉ោង៤រសៀល ថ្ងៃទី១៨ ខែមេសា ឆ្នាំ២០១៩ ស្ថិតនៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង ។
យោងតាមសមត្ថកិច្ចនគរបាលស្រុកបានឲ្យដឹងថា បុរសរងគ្រោះមានឈ្មោះ ទិច ឈិន អាយុ៦៧ឆ្នាំ មុខរបរកសិករ រស់នៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង ។
តាមអ្នកភូមិបានឲ្យដឹងថា មុនកើតហេតុ មានភ្លៀងលាយខ្យល់បោកបក់យ៉ាងខ្លាំង ធ្វើឲ្យអ្នកស្រុកម្នាក់ៗ រត់ចូលក្នុងផ្ទះរៀងៗខ្លួន ក្រោយមកស្រាប់តែឃើញបុរសរងគ្រោះបានដើរចេញពីក្នុងផ្ទះមកក្រៅ និងដើរក្រឡេកមើលជុំវិញរកខោអាវ ដែលហាល ស្រាប់តែមានរន្ទះមួយគ្រាប់បាញ់ចំបុរសខាងលើ លាន់សូរកក្រើកដីបង្កការភ្ញាក់ផ្អើលនាំគ្នាជួយសង្គ្រោះ ធ្វើចលនាដៃជើងបម្រុងយកទៅកាន់មន្ទីរពេទ្យ អកុសលហួសពេលបាត់ទៅហើយ ។
សពត្រូវបានសមត្ថកិច្ចមូលដ្ឋានធ្វើកំណត់ហេតុ និងប្រគល់ឲ្យក្រុមគ្រួសារយកមកធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
